Është mbyllur edhe xhiroja e 21-të në Superligën e Kosovës në futboll, me dy ndeshje interesante të zhvilluara sonte.
Gjilani triumfoi me rezultatin e ngushtë 2:1 përballë Dukagjinit. Dy golat për kuqebardhët, i shënoi kapiteni Gerhard Progni. Mesfushori ishte i saktë nga penalltia në minutat 25-të dhe 64-të.
Ndërkohë, për Dukagjinin, realizoi Mentor Zhdrella po ashtu nga penalltia (59’). Gjilani ndeshjen e përfundoi me një lojtar më pak, pasi në minutat shtesë të pjesës së parë, u përjashtua portieri Enea Koliçi.
Me këtë fitore, Gjilani ka 42 pikë, sa i ka edhe Ballkani që është lider. Dukagjini mbetet në pozitën e parafundit në tabelë me 18 pikë
Në duelin tjetër, Prishtina ka marrë pikën e parë pas katër humbjeve rresht. Bardhekaltërit kanë barazuar 0:0 në udhëtim te Drenica.
Me këtë barazim, Prishtina ngrihet në kuotën e 25 pikëve dhe mbetet në pozitën e gjashtë në tabelë, ndërsa Drenica zë vendin e pestë me 28 pikë.
/Tëvë1/
