Rreth 150 vende kanë rënë dakord tashmë për të njohur Palestinën si shtet, ndërsa disa të tjera pritet të formalizojnë këtë vendim gjatë kësaj jave. Megjithatë, Gjermania ka bërë të qartë se nuk do të jetë mes tyre.
Vendimi i udhëheqësit të ri gjerman, Olaf Merz, për të mos marrë pjesë në takimin e Asamblesë së Përgjithshme të Kombeve të Bashkuara në Nju Jork, ku pritet të diskutohet kjo çështje, shihet si i lidhur ngushtë me qëndrimin e Berlinit ndaj njohjes së Palestinës si shtet.
Megjithëse Merz dhe këshilltarët e tij qeveritarë argumentojnë se mungesa e tij është kryesisht për shkak të angazhimeve urgjente buxhetore në Berlin, kjo ka ngjallur spekulime për motivet politike të qëndrimit gjerman.
Në vend të Merzit, ministri i Jashtëm gjerman, Joe Wadephul, është dërguar në Nju Jork, por pritet të ndërpresë vizitën për t’u kthyer në Berlin dhe për të marrë pjesë në votimin e rëndësishëm buxhetor në Bundestag të mërkurën, i cili përfshin edhe pagesën prej 576 milionë dollarësh të Gjermanisë për anëtarësimin në OKB.
Wadephul do të kthehet në Nju Jork për të folur në Asamblenë e Përgjithshme të OKB-së të shtunën, kur shumica e udhëheqësve të tjerë shtetërorë do të jenë larguar dhe interesimi i mediave pritet të jetë më i ulët, ka shkruar gazeta The Guardian.
Sipas burimeve brenda qeverisë gjermane, Merz mund të ishte dërguar me aeroplan në Nju Jork edhe me një njoftim të shkurtër dhe të kthehej në kohë për votimin në Bundestag.
Madje, edhe OKB-ja ishte e gatshme t’i siguronte një vend të respektueshëm për të folur në këtë forum. Megjithatë, kjo mundësi nuk u shfrytëzua.
Ndërkohë që Britania e Madhe, Kanadaja dhe Australia kanë deklaruar se po përgatiten për njohjen e Palestinës si shtet, Gjermania, së bashku me Italinë, kanë theksuar se konsiderojnë se një njohje në këtë fazë është e parakohshme dhe e papërshtatshme.
