Kancelari gjerman, Friedrich Merz akuzoi të mërkurën Rusinë për përpjekje të qëllimshme për destabilizimin e Evropës, duke përmendur së fundmi edhe ndërhyrjet me dronë në hapësirat ajrore të Polonisë dhe Rumanisë, dy vende anëtare të NATO-s.
Gjatë një debati për buxhetin në parlament, Merz deklaroi: “Presidenti rus Putin ka kohë që po teston kufijtë. Ai saboton, spiunon, vret dhe mbjell qëllimisht pasiguri.” Ai shtoi: “Rusia synon të destabilizojë shoqëritë tona, por ne do ta parandalojmë që kjo të ndodhë, si nga jashtë ashtu edhe nga brenda.”
Duke iu përgjigjur kritikave nga partitë opozitare për qëndrimin e qeverisë ndaj luftës në Ukrainë, Merz theksoi se mbështetja për përpjekjet për paqe është e qëndrueshme, por jo në kurriz të pavarësisë së Ukrainës, ka shkruar Anadolu.
“Përfundimi i kësaj në kurriz të sovranitetit politik dhe integritetit territorial të Ukrainës është jashtë diskutimit,” tha ai.
“Një kapitullim vetëm sa do ta inkurajonte Putinin të kërkonte objektivin e tij të radhës. Ne kemi parë se sa konkrete mund të bëhet kjo me shkeljen e hapësirës ajrore polake dhe rumune në ditët e fundit,” paralajmëroi Merz.
Në përfundim, ai bëri të ditur se Gjermania dhe aleatët evropianë do të forcojnë kapacitetet mbrojtëse për të penguar agresionin e mëtejshëm nga ana e Rusisë.
