Ish-anëtari i kryesisë së LDK-së, Rexhep Gjergji ka rrëfyer takimin me ish-presidentin Ibrahim Rugova pas nisjes së luftës në Prekaz.
Gjergji në emisionin “Info Nata” në tëvë1 ka treguar se takimi ka ndodhur me datën 5 mars 1998 në shtëpinë e Rugovës në Velani.
Sipas tij në atë takim kishin vendosur vetëm për riorganizimin e kryesisë së LDK-së pasi siç ka thënë ata kishin pak ide pasi mundësitë për të bërë diçka i kishin të vogla.
“Më datën 4 mars unë kisha një obligim privat për të shkuar në Pejë dhe gjatë rrugës ishin disa postblloqe policore shumë të vrazhda në sjellje dhe shihej se diçka e veçantë ose ka ndodhur ose pritej të ndodhte. Të nesërmen jam kthyer në Prishtinë dhe i ndjeri Enver Maloku më ka thënë se në Drenicë ka shpërthyer dhe më tregon që në fshatin Prekaz, në lagjen e Jasharajve ka të shtëna, ka luftë por që nuk dihet saktësisht se çfarë ka ndodhur. Presidenti Rugova atë ditë nuk kishte dalë në zyrë dhe në orët e pasdites kam shkuar unë në shtëpinë e Rugovës së bashku me Naip Zeken që ishte anëtar i kryesisë së LDK-së në atë kohë dhe kam biseduar me Rugovën se çfarë të bëjmë. Natyrisht që ishte e vështirë edhe ai të thoshte diçka për shkak se mundësitë i kishte te vogla, kishim pak ide sepse nuk kishim fare mundësi dhe krejt çfarë u morëm vesh aty ishte që të mblidhej kryesia dhe të shohim një formë të riorganizimit”, ka thënë Gjergji në emisionin “Info Nata” në tëvë1.
