Gjatë viteve të 90-ta, Bozhidar Deliq ishte ndër personat më të afër të kasapit të Ballkanit, Slobodan Millosheviq.
Madje ai ishte i graduar si një prej gjeneralëve kryesor të Ushtrisë Jugosllave.
Ai dyshohet të ketë qenë i përfshirë në krimet që janë kryer ndaj popullatës civile shqiptare në rajonin e Gjakovës. Ndërsa sot zë një pozitë të rëndësishme në shtetin e Serbisë.
Deliq është emëruar nënkryetar në Kuvendin serb.
Kështu qeveria e Serbisë po vazhdon t’i glorifikoj figurat që kanë marrë pjesë në luftërat e viteve të 90-ta.
Bozhidar Deliq asnjëherë nuk u dënua për krimet që dyshohet t’i ketë kryer në Kosovë.
“Karriera e tij është e lidhur me Kosovën, ai ishte shumë aktiv në ushtrinë e Slobodan Millosheviqit, është një shovinist i vërtetë. Grupet e ushtarëve që ai i ka udhëhequr kanë bërë krime në Kosovë, në zonat e Gjakovës dhe të Pejës. Nuk e di përse askush nuk e ka dënuar atë për krimet që dyshohet t’i ketë bërë. Serbia akoma nuk është e gatshme për ndryshime serioze në politike”, tha publicisti Dushan Janjiq.
Deliq para Tribunalit Penal Ndërkombëtar për ish-Jugosllavinë, si dëshmitar mbrojtës, kishte deklaruar se ai nuk kishte njohuri për vrasjet masive të shqiptarëve.
Raporti i gazetarit Shpat Blakçori.