Policia e Kosovës ka zbuluar tri plantacione me bimë narkotike të llojit kanabis-sativa në fshatin Zhiti të komunës së Podujevës.
Sipas raportit 24-orësh të Policisë, operacioni është kryer në një zonë pyjore të këtij fshati, ku janë gjetur gjithsej 525 bimë të dyshuara narkotike, si dhe mjete pune që ishin përdorur për kultivimin e tyre.
“Raportohet se në pyllin e fshatit janë gjetur tri plantacione të mbjella me 525 bimë narkotike të llojit kanabis-sativa,” thuhet në raportin e Policisë së Kosovës.
Pas marrjes së mostrave për analizë, me urdhër të prokurorit kompetent, bimët narkotike dhe mjetet e punës janë asgjësuar në vendin e ngjarjes.
“Pas marrjes së mostrave, me vendim të prokurorit, bimët dhe mjetet e punës janë asgjësuar në vendin e ngjarjes. Rasti është duke u hetuar,” thuhet më tej në njoftim.
Deri në këtë fazë të hetimeve, nuk raportohet për persona të arrestuar, ndërsa Policia ka nisur hetimet për identifikimin e të përfshirëve në këtë veprimtari të paligjshme.
