Në Prekaz të poshtëm të Skenderajt ekipet e Komisionit Qeveritar për Persona të Zhdukur, Institutit të Mjekësisë Ligjore dhe Drejtorisë së Policisë për Hetimin e Krimeve të Luftës, filluan punimet.
Pas gërmimeve aty u zhvarrosën mbetje mortore të tre individëve të cilët dyshohet se janë nga lufta e fundit në Kosovë.
“Prej mëngjesit këtu menjëherë kemi hasur në trupin e parë, deri më tani kemi tërhequr mbetjet mortore të së paku tre individëve të cilët dyshohet se i takojnë luftës së fundit në Kosovë. Tash këta trupa do të i tërheqim në IML ku do të ekzaminohen, do të merren masat do të dërgohen në një laborator jashtë vendit dhe presim rezultate për identifikimin e tyre”, tha Ditar Haliti, antropolog në IML.
Tutje, Ilaz Gashi nga ky komision thotë se është hera e katërt që bëhen gërmime në këtë lokacion.
“Kjo është hera e tretë, njëherë kanë gërmu edhe Tribunali pas luftës, kfori francez, në fakt është i katërti sepse edhe UNMIK-u ka bërë gërmime në këtë lokacion”, tha Gashi.
Për të përcjell nga afër këto gërmime ishin edhe nga Shoqata “ Pengu i Lirisë “ në Skenderaj.
“Komuna e Skenderajt kryesisht i kemi edhe 113 persona ende të pagjetur, këta qysh po supozohet kanë qenë te fshatrat Polac, Morinë, Rezallë, ndërsa tek fshati Prekaz i kemi edhe 9 të pagjetur”, tha Met Thaçi nga kjo shoqatë.
Për të parë nga afër punimet doli edhe deputeti i PDK-së, Mërgim Lushtaku.
“E ndjej obligim moral, kushtetues dhe njerëzor që të vij këtu, Prekazi është dhe vendbanimi im, sigurisht e dim shumë mirë që ka shumë të zhukur në Kosovë dhe shumë familje presin fatin e familjarëve të vet që të gjenden, dhe sigurisht është një dhimbje e dyfisht por edhe një lehtësim për familjet që i kanë të zhdukur antarët e tyre”, u shpreh Lushtaku.
Në Prekaz të Skenderajt punimet do të vazhdojnë edhe ditëve në vijim, varësisht kushteve atmosferike.
Ndërkohë, kanë rifilluar gërmimet në disa lokacione të Serbisë, të dyshuara për varreza të mundshme massive.
Njoftimin për rifillimin e kërkimit të personave të zhdukur gjatë luftës në Kosovë, e ka bërë vet Komisioni Qeveritar për Persona të Zhdukur.
