Policia e Kosovës është duke realizuar aksion në veri të vendit, që lidhet me sulmin terrorist të 24 shtatorit, në Banjskë.
Zëvendësdrejtori rajonal për veriun e Kosovës, Veton Elshani, për teve1.info tha se deri më tani janë gjetur armë dhe disa mjete të dyshimta eksploduese.
Elshani bëri të ditur se bastisjet kanë ndodhur në tre lokacione në Mitrovicë të Veriut, tre në Zveçan dhe një në Banjskë.
Aksioni lidhet me sulmin terrorist të 24 shtatorit, ku një grup i armatosur serb sulmoi Policinë e Kosovës me ç’rast mbet i vrarë rreshteri Afrim Bunjaku.
Në aksionin e Policisë, dhjetëra sulmues të armatosur e uniformuar serbë u rrethuan në fshatin Banjskë, ku nga ky aksion tre sulmues u vranë, si dhe u kap edhe arsenal i madh armësh.
Përgjegjësinë për organizimin e grupit të armatosur e mori Millan Radoiçiq, ish-nënkryetar i Listës Serbe, i cili u lirua nga Gjykata e Lartë e Serbisë, një dië pas ndalimit.
Radoiçiq, dyshohet se ka kryer një sërë veprash si trafikim armësh dhe krime kundër sigurisë së përgjithshme./teve1.info/
