Shfaqja ajrore në Dallas të Shteteve të Bashkuara të Amerikës, u kthye në tragjedi gjatë së dielës. Kjo pasi, gjatë organizimit, dy avionë ushtarakë u përplasën mes vete duke lënë të vdekur gjashtë persona.
Analiza e ekspertizës mjekësore, arriti ta identifikojë numrin e saktë të viktimave. Ndërsa këtë e konfirmoi edhe gjykatësi i vendit Clay Jenkins. Tutje ai potencoi se autoritetet po vazhdojnë akoma të hulumtojnë rastin.
Fillimisht zyrtarë të vendit nuk specifikuan numrin e personave brenda avionit por kreu i kompanisë që organizoi shfaqjen ajrore tregoi se sa janë zakonisht sipas rregullave të ekuipazhit.
“Sot rreth orës 1:15 ne kishim dy avionë duke fluturuar. Njëri me një ekuipazh prej katër deri në pesë persona ndërsa tjetri avion ishte me një pilot të vetëm. Do të vijoj edhe hetimi i plotë me analiza inxhinierike dhe intervista. Familjet dhe të gjithë pjesëmarrësit që ishin të pranishëm janë nën përkujdesje”, tha ai.
Ai tregoi se avionët drejtohen nga profesionistë dhe njerëz të trajnuar madje edhe nga pilotë në pension.
Kryetari i Bashkisë së Dallasit, Eric Johnson tha se Bordi Kombëtar i Sigurisë së Transportit me ndihmën e policisë lokale dhe zjarrfikëseve arritën të menaxhojnë situatën.
Ai e cilësoi këtë rast si një tragjedi të tmerrshme, aksident ky jo i rrallë viteve të fundit përgjatë shfaqjeve ajrore në SHBA.
Në këtë ngjarje e cila shënohet si dita përkujtimore e forcave ajrore, morën pjesë rreth 600 persona, por që shpetuan pa lëndime./Tëvë1/
