Ish-kryetari i Komunës së Shtërpcës, Bratisllav Nikoliq, është liruar nga paraburgimi, pasi që ka dhënë dorëzani në vlerë prej 50 mijë eurove, lidhur me rastin “Brezovica”.
Këtë për teve1.info e ka konfirmuar avokati mbrojtës i të pandehurit, Artan Qerkini.
Ndërsa, Qerkini konfirmoi se edhe pesë të dyshuarit tjerë të nacionalitetit serb kanë paguar në total 190 mijë euro dorëzani, ku të njëjtit do të mbrohen në liri.
Lidhur me rastin “Brezovica”, i pandehuri Nikoliq, gjendej në masën e paraburgimit që nga 21 dhjetori i vitit 2021.
Nikoliq dhe të arrestuarit e tjerë dyshohet se kanë marrë villa, vetura dhe dhurata të tjera në këmbim të lëshimit të lejeve për ndërtimin e villave dhe objekteve të tjera në Parkun Kombëtar të Maleve të Sharrit, ku gjendet edhe Brezovica.
Sipas prokurorit, Rasim Malokut, shumica e ndërtesave të ndërtuara janë ndërtuar kundërligjshëm.
Prokuroria Themelore e Ferizajt dyshon se ish-kryetari i Komunës së Shtërpcës, Bratisllav Nikolliq, ka përfituar deri në 1 milion euro për lejet e lëshuara kundërligjshëm për ndërtimin e objekteve në Brezovicë, në Komunën e Shtërpcës.
Pos Nikolliqit, Policia e Kosovës, me urdhër të Prokurorisë së Shtetit, arrestoi edhe rreth dhjetë persona në Shtërpcë, mes të cilëve drejtorin e Urbanizimit dhe disa zyrtarë e pronarë ndërmarrjesh, bëri të ditur Prokuroria Themelore në Ferizaj. Ata dyshoheshin për veprat penale: marrje dhe dhënie e ryshfetit, si dhe keqpërdorim i pozitës zyrtare.
Nikolliq, para se t’i bashkohej Listës Serbe në vitin 2013, ishte kryetar i Shtërpcës nga radhët e Partisë së Pavarur Liberale, e cila në fillim të vitit 2020 shpalli moratorium politik, si pasojë e dominimit total të Listës Serbe./teve1.info/
