Gjashtë persona janë arrestuar në një aksion të zhvilluar nga Drejtoria për Hetimin e Krimit të Organizuar dhe Krimeve të Rënda e Policisë së Kosovës në koordinim me Prokurorinë Themelore Prizren, të zhvilluar në Prizren dhe Suharekë.
Personat e arrestuar dyshohen për përfshirje në veprat penale “fajde” dhe “detyrim”.
“Gjatë zbatimit të operacionit policor, është realizuar urdhër-kontrolli i gjykatës, ku në vendbanimet e personave të dyshuar janë sekuestruar: 20 njësi banesore dhe lokale afariste, 5 automjete, 5 armë dhe municion të kalibrit të ndryshëm, dokumentacione, si: kontrata, para-kontrata, para të gatshme, prova digjitale, si dhe janë bllokuar llogaritë bankare të personave të dyshuar”, thuhet në komunikatën e përbashkët të Policisë dhe Prokurorisë.
Sipas komunikatës të arrestuarit dyshohet se kanë përfituar mbi 1 milion euro
“Të dyshuarit kanë arritur të përfitojnë në mënyrë të kundërligjshme nga viktima shuma të mëdha të parave si dhe prona të paluajtshme dhe të luajtshme si formë e interesit nga veprimtaria e fajdesë, vlera e të cilave kalon shumën mbi 1 milion euro. Të dyshuarit pas intervistimit, me aktvendim të prokurorit nga PTh- Prizren, ndalohen për 48 orë”, thuhet në komunikatë.
