Përmes raportit 24-orësh, Policia ka bërë të ditur se mbrëmjen e së hënës një femër ka raportuar se vjehrri i saj ka shkaktuar dhunë ndaj saj ku viktima me dy fëmijët e saj janë dërguar në strehimore, teksa i dyshuari është liruar.
Të njëjtën ditë janë raportuar edhe tri raste tjera të dhunës në familje, ku viktimat kanë qenë femra dhe se dy të dyshuar janë dërguar në mbajtje.
“Gllogoc 08.08.2022 – 22:08. Është arrestuar i dyshuari mashkull kosovar, nën dyshimin se ka ushtruar dhunë ndaj bashkëshortes së tij viktimës femër kosovare. Viktima ka pranuar tretman mjekësor. Me vendim të prokurorit, i dyshuari është dërguar në mbajtje. Prishtinë 08.08.2022 – 19:00. Ankuesja femër kosovare raporton se i dyshuari mashkull kosovar (bashkëshorti i saj) e ka sulmuar fizikisht dhe ka ushtruar dhunë psikike ndaj saj. Nuk raportohet për lëndime trupore. I dyshuari është arrestuar dhe pas intervistimit me vendim të prokurorit është dërguar në mbajtje. Rasti nën hetime. Podujevë 08.08.2022-18:13. Viktima femër kosovare ka pranuar tretman mjekësor pasi që e njëjta dyshohet se është sulmuar fizikisht nga bashkëshorti i saj i dyshuari mashkull kosovar. Palët janë intervistuar dhe me vendim të prokurorit, i dyshuari është arrestuar dhe dërguar në mbajtje”, thuhet në raport.
Kurse, të martën në Fushë Kosovë janë arrestuar dy persona të cilët janë dërguar në mbajtje për dhunë në familje.
“Fushë Kosovë 09.08.2022 – 02:25. Raportohet se është arrestuar një i dyshuar mashkull kosovar pasi që i njëjti e kishte sulmuar viktimën femër kosovare duke i shkaktuar lëndime trupore. Viktimës i është ofruar tretman mjekësor, në konsultim me prokurorin, pas intervistimit i dyshuari është dërguar në mbajtje. Fushë Kosovë 09.08.2022 – 01:30. Është arrestuar i dyshuari mashkull kosovar nën dyshimin se pas një mosmarrëveshje ka sulmuar fizikisht bashkëshorten e tij, viktimën femër kosovare. Viktimës iu është ofruar trajtim mjekësor, ndërsa i dyshuari me vendim të prokurorit pas intervistimit është dërguar në mbajtje”, thuhet në raport./teve1.info/