Gjashtë persona, përfshirë tre fëmijë, humbën jetën të enjten pasdite pasi një helikopter turistik u rrëzua në lumin Hudson në New York.
Autoritetet konfirmuan se viktimat ishin një familje nga Spanja, përfshirë dy prindërit dhe tre fëmijët e tyre të moshave 4, 5 dhe 11 vjeç, si dhe piloti i helikopterit. Të gjithë ishin në bord në momentin e aksidentit, i cili ndodhi pak minuta pas ngritjes, raporton BBC News.
Helikopteri, një Bell 206 me dy helika, operohej nga kompania New York Helicopters dhe u ngrit nga Downtown Skyport në pjesën jugore të Manhattan-it në orën 14:59 me orën lokale. Sipas autoriteteve, helikopteri humbi kontrollin pranë urës George Washington teksa po fluturonte përgjatë bregdetit të New Jersey-t dhe u përmbys para se të përplasej në ujë. Pamje filmike të ngjarjes tregojnë helikopterin duke u rrotulluar në ajër me kokë poshtë përpara se të binte në lumë, shkruan BBC.
Thirrjet e para për ndihmë u morën rreth orës 15:17 dhe menjëherë u nisën ekipet e shpëtimit me anije dhe zhytës. Komisioneri i Zjarrfikësve të New Yorkut, Robert Tucker, tha se “notuesit ishin në ujë pak minuta pas marrjes së thirrjes” dhe se u ndërmorën masa të menjëhershme për shpëtimin e jetëve. Megjithatë, katër persona u shpallën të vdekur në vendngjarje dhe dy të tjerë ndërruan jetë në spital.
Identitetet e viktimave nuk janë zyrtarisht publikuar, pasi autoritetet po presin njoftimin zyrtar për familjet, por sipas mediave, bëhet fjalë për Agustín Escobar dhe bashkëshorten e tij Mercè Camprubí Montal, të dy drejtorë të lartë në kompaninë Siemens.
Presidenti amerikan Donald Trump reagoi përmes një postimi në Truth Social, duke e quajtur aksidentin “të tmerrshëm” dhe duke shprehur ngushëllime për familjet dhe miqtë e viktimave: “Zoti i bekoftë ata”, shkroi ai.
Administrata Federale e Aviacionit (FAA) njoftoi se hetimet për aksidentin do të udhëhiqen nga Bordi Kombëtar i Sigurisë së Transportit. CEO i kompanisë New York Helicopter Charter Inc, Michael Roth, tha për CNN se ishte “i shkatërruar” nga lajmi dhe se e kuptonte thellësisht dhimbjen si prind dhe gjysh.
Dëshmitarë të ngjarjes përshkruan momente paniku. Banorë të Jersey City thanë se dëgjuan zhurmë të fortë dhe panë pjesë të helikopterit që binin nga qielli. Një dëshmitare tha se mendoi fillimisht se ishte pluhur apo zogj, derisa paniku u rrit me ardhjen e mjeteve të emergjencës.
Ky nuk është rasti i parë i një aksidenti fatal me helikopterë turistikë në New York. Në vitin 2018, një helikopter tjetër u rrëzua në lumin East River, duke shkaktuar vdekjen e pesë pasagjerëve. Ndërsa në vitin 2009, një helikopter me turistë italianë u përplas me një avion privat mbi lumin Hudson, duke shkaktuar nëntë viktima.
Pjesa ku ndodhi aksidenti është një zonë shumë e frekuentuar pranë anës perëndimore të Manhattan-it, e njohur për restorantet, dyqanet dhe afërsinë me Universitetin e New Yorkut. Tronditja nga aksidenti është e ndjeshme si në SHBA, ashtu edhe në Spanjë, ku familja kishte pozicione të rëndësishme në botën korporative.
Hetimet pritet të përqendrohen në shkaqet teknike të aksidentit dhe mundësinë e gabimit njerëzor, si dhe në çështjet e mirëmbajtjes së helikopterit.
