Shërbimi Spitalor Klinik dhe Universitar i Kosovës (ShSKUK) ka njoftuar se gjatë festave të fundvitit, në Klinikën e Kirurgjisë Plastike të QKUK-së është trajtuar një numër i madh pacientësh të lënduar si pasojë e përdorimit të mjeteve piroteknike, kryesisht petardave.
Sipas SHSKUK-së, pjesa më e madhe e të lënduarve janë fëmijë dhe adoleshentë, të cilët kanë pësuar kryesisht lëndime në duar, veçanërisht në gishtërinj.
Në disa raste, këto lëndime kanë përfunduar me amputime të pjesshme ose të plota, si dhe me dëmtime serioze funksionale të tendinave.
ShSKUk ka bërë të ditur se po ashtu, janë evidentuar edhe lëndime në regjionin e fytyrës, të cilat kërkojnë trajtim të specializuar dhe mund të lënë pasoja afatgjata estetike dhe funksionale.
Aktualisht, gjashtë pacientë janë të hospitalizuar në Klinikën e Kirurgjisë Plastike për shkak të lëndimeve shumë të rënda të duarve, të cilat kërkojnë trajtim të mëtejmë mjekësor dhe ndërhyrje të specializuara kirurgjikale.
