Gëzim Plakolli, kandidat i LDK-së për kryetar të Mitrovicës së Jugut, ka folur në emisionin “Info Nata” në Tëvë1 për programin e tij dhe prioritetet që synon të realizojë në komunë.
“Unë si kandidat garoj me një program real, i cili buron nga diskutimet që i kemi bërë me përfaqësuesit e nën-degës sonë. Prioriteti im është që të kemi një Mitrovicë të zhvilluar ekonomikisht, të jetë atraktive për investitorët, më e pastër, të ofrojë shërbime cilësore dhe transparente, dhe të kemi gara të barabarta, të cilat do të burojnë nga vetë qytetarët e Mitrovicës”, ka thënë Plakolli.
Ai theksoi gjithashtu rëndësinë e investimeve në arsimin parashkollor dhe infrastrukturën shkollore:
“Ne po ashtu planifikojmë të ndërtojmë çerdhe të reja, pasi që disa çerdhe që lidhen me këtë parti të kandidimit kanë mbetur gjysmë të filluara dhe gjysmë të përfunduara. Në disa shkolla, kushtet nuk janë të duhura për vijimin normal të mësimit, dhe ne do të mundohemi t’i rregullojmë ato dhe t’i bëjmë më të mira”, ka shtuar Plakolli.
Kandidati i LDK-së premton një qeverisje transparente dhe fokus të veçantë tek zhvillimi ekonomik dhe shërbimet publike për qytetarët e Mitrovicës së Jugut.
