Njohësi i Ekonomisë, Safet Gërxhaliu, vlerëson që gjendja ekonomike në Kosovë nuk është ashtu siç paraqitet nga qeveria Kurti.
Gërxhaliu, në emisionin “Info Nata”, në Tëvë1, është shprehur se realiteti në Kosovë dallon shumë nga ajo çfarë shkruhet në letra, të cilin realitet siç ka thënë ai ‘më së miri e shijon apo e përjeton qytetari i Kosovës’.
“Është e vërtetë që në Kosovë numrat në letra bëhen çdo gjë. Unë do të isha ndër kosovarët më të lumtur nëse shkallën e papunësisë do ta kishim 4%, nëse do ta kishim inflacionin 1.4%, ta kemi rritjen ekonomike 4.7% por të gjitha këto janë vërtetë të bukura të shkruara në letër, por realiteti është krejt tjetër dhe atë realitet më së miri e shijon apo e përjeton qytetari i Kosovës”, ka thënë ai.
Gërxhaliu, ka pasur kritika edhe për mënyrën e trajtimit të diasporës pasi mendon se investimet e tyre nuk duhet të trajtohen si të huaja por si para apo investime per qellime familjare në Kosovë.
“Në këtë drejtim nëse mendohet për investimet që vijnë nga diaspora dhe ato shumica janë të orientuara në patundshmëri, atëherë ajo qëndron mirëpo besoj që duke pasur parasysh kontributin që ka dhënë, po e jep dhe që do të vazhdojë ta jap, besoj se meritojnë një trajtim më ndryshe dhe ato mjete nuk duhet të trajtohen si investime të huaja por investim apo para të diasporës”, ka shtuar Gerxhaliu./teve1.info/
