Njohësi i ekonomisë, Safet Gërxhaliu, thotë se Kosova ka nevojë për një rritje ekomomike substanciale dhe jo vetëm numerike.
Sipas tij, Kosova ka nevojë për një rritje përmbajtjesore jo vetëm kuantitative.
“Duhet të kuptohet e vërteta, duhet t’i gëzohemi fakteve të të arriturave ekonomike dhe duhet të nga gëzojë çdo sukses në aspektin ekonomik. Pajtohemi që Kosova ka nevojë për një rritje substanciale dhe jo për një rritje numerike siç po ndodh apo siç po parashikohet. Në këtë drejtim besoj që s’kemi nevojë për furinë, kemi arsye të jemi më të fokusuar dhe të kuptohet rëndësia e zhvillimit ekonomik. Të kuptohet që Kosova ka nevojë për një rritje përmbajtjesore jo vetëm kuantitative”, tha ai në emisionin “Info Nata” në Tëvë1.
Njohësi i ekonomisë tha se ndikojnë shumë faktorë në rritjen ekonomike, duke shtuar se ngritjen e saj institucionet po e bazojnë vetëm në konsum.
“Është shumë e rrugës që Kosova të ketë rritje 2 për qind apo 1.5 për qind. Mirëpo, në këtë rritje ekonomike kemi shumë indikatorë siç janë investimet e huaja direkte, ngritja e eksporteve, rritja e vendeve të punës, kontraktimi i vendeve të punës për tregjet e jashtme e shumë faktorë të tjerë që vërtetë do të iu kishin dhënë substancë zhvillimit ekonomik në Kosovë”, tha ai.
“Këtë rritje ekonomike të Kosovës që po e promovojnë institucionet po e bazojnë vetëm në konsum”.
Partia në pushtet ka thënë se sipas raportit të Bankës Botërore lidhur me rritjen ekonomike për vendet e Ballkanit Perëndimor, parashikohet që Kosova pritet të ketë rritje ekonomike prej 3.7 për qind këtë vit dhe prej 3.9 për qind në vitin 2025.
Në faqen zyrtare, partia në pushtet ka publikuar këto të dhëna, derisa ka theksuar se Kosova renditet e para në Ballkanin Perëndimor.
“Kosova me rritjen më të lartë ekonomike në Ballkanin Perëndimor për vitin 2024 dhe 2025, thotë raporti dyvjeçar i Bankës Botërore që u publikua sot”, thuhet në postimin në Facebook./teve1.info/
