Ministrja e Punëve të Jashtme, Donika Gervalla-Schwarz ka thënë se vendimi i Kenias për ta njohur zyrtarisht Kosovën si shtet thekson përparimin dhe forcimin e pozitës së Kosovës në skenën ndërkombëtare dhe në kontinentin afrikan.
Gërvalla ka shtuar se mezi pret ndërtimin e marrëdhënieve të mirëfillta diplomatike me Republikën e Kenias dhe fillimin e bashkëpunimit mes dy shteteve në fusha të ndryshme.
“Mirëpresim vendimin e Republikës së Kenias për të njohur zyrtarisht Republikën e Kosovës, një lajm i rëndësishëm që thekson përparimin dhe forcimin e pozitës sonë në skenën ndërkombëtare dhe në kontinentin afrikan. Nga takimi i parë që kemi pasur në vitin 2021 bashkë me Presidenten Vjosa Osmani me ish-Presidentin Uhuru Kenyatta, kemi parë rrugën graduale drejt njohjes reciproke. Mezi presim ndërtimin e marrëdhënieve të mirëfillta diplomatike me Republikën e Kenias dhe fillimin e bashkëpunimit mes dy shteteve tona në fusha të ndryshme”, ka shkruar ajo në Facebook.
Shteti i Kenias e ka njohur pavarësinë e Kosovës të mërkurën, duke u bërë kështu shteti i 118-të që e njeh atë. Njohja nga Kenia është e para për Kosovën në katër vjetët e fundit.
