Ministrja e Punëve të Jashtme e Kosovës, Donika Gërvalla në një konferencë të përbashkët me homologen e saj, Elina Valtonen, ka thënë se ura e Ibrit duhet të hapet.
Sipas saj, vetëm kështu ajo shëndrrohet në një simbol të pajtimit.
Tutje, Gërvalla tha se Kosova është e përkushtuar të zbatojë sundimin e ligjit në çdo cep të territorit të saj.
“Sundimi i ligjit është thelbësor për stabilitetin e brendshëm të Kosovës. Në takim kemi biseduar për Mitrovicën Veriore dhe urën kryesore të saj. Kjo urë e cila ka simboluar ndarje dhe përçarje për shumë vjet duhet të hapet dhe vetëm kështu ajo shndërrohet në një simbol të pajtimit dhe të bashkimit. Kosova është e përkushtuar të zbatojë sundimin e ligjit në çdo cep të territorit të saj duke garantuar të drejta të barabarta për gjithë qytetarët pavarësisht përkatësisë së tyre etnike”, u shpreh Gërvalla në konferencë për media.
Ministrja Donika Gërvalla po ashtu theksoi se kanë diskutuar për sfidat aktuale të sigurisë në Evropë dhe agresionin rus. Teksa deklaroi se në këtë takim kanë diskutuar edhe për zhvillimet në veri.
