Ministrja e Punëve të Jashtme e Kosovës, Donika Gërvalla-Schwarz ka thënë se presidenti serb Aleksandër Vuçiq ka kërcënuar disa herë Kosovën me luftë.
Kryediplomatja ka thënë se argumente për këtë janë vendosja e trupave në kufirin me Kosovën, dërgimi për vizitë i ambasadorit rus te këto trupa, dërgimi i avionëve luftarakë, rritja e kapaciteteve ushtarake, rritja deri në 100 e stërvitjeve të përbashkëta me Rusinë si dhe inkorporimi i ushtrisë ruse në ministrinë serbe të Mbrojtjes.
“Arsyeja kryesore që kjo qasje agresive nuk po shndërrohet në konflikt të hapur është frenimi i qeverisë sonë dhe prania e trupave amerikane në Kosovë. Vetëm së fundi, Shtetet e Bashkuara i dhanë një paralajmërim të ashpër Vuçiqit, i cili donte të vendoste trupa serbe në vendin tonë. Një ushtri që ishte përgjegjëse për krimet më të rënda dhe për dëbimin e gati gjysmës së popullsisë sonë dhe që nuk do të kthehet kurrë në Kosovë përderisa jemi ne”, ka thënë Gërvalla-Schwarz për Israel Hayom.
Tutje ajo ka folur edhe për lidhjet e presidentit Vuçiq dhe ministrit Daçiq me kryekriminelin Millosheviq.
“Vuçiq ishte ministri i tij i propagandës dhe Daçiq ishte dora e tij e djathtë gjatë luftës, masakrës dhe mizorive më të rënda ndaj vendit dhe popullit tonë, jo vetëm që nuk kërkuan falje, por edhe publikisht i nderojnë kriminelët e luftës dhe i mohojnë e falsifikojnë ngjarjet”, ka deklaruar ministrja.
“Kosova, ashtu si Izraeli, është mësuar me kërcënime të vazhdueshme. Kjo nuk përcakton jetën tonë. Ne jemi pjesë e Perëndimit, ndërsa Serbia është përfaqësuese e Putinit. Nuk është perfekte, por ne vazhdojmë të jetojmë jetën tonë dhe të zhvillojmë vendin tonë. ”
E pyetur se kur do të emërojë Kosova ambasadorin në Jerusalem, Gërvalla ka thënë se kjo çështje do të trajtohet në gjysmën e parë të vitit.
“Kjo është një çështje që ne me siguri do ta trajtojmë në gjysmën e parë të këtij viti. Vendimi përfundimtar nuk varet aq shumë nga marrëdhënia jonë dypalëshe, por më tepër nga një ristrukturim i vazhdueshëm i shërbimit tonë diplomatik për ta bërë atë dukshëm më efektiv. .”, ka thënë Gërvalla.
