Ministrja e Drejtësisë, Donika Gëravlla ka vlerësuar kontributin e shefit të zyrës së BE-së në Kosovë, Aivo Orav i cili është në përfundim të mandatit të tij në Kosovë.
Gërvalla ka thënë se Orav ka dhënë një kontribut të jashtëzakonshëm në afrimin e Kosovës me Bashkimin Evropian dhe të Bashkimit Evropian me Kosovën,si dhe mbështeti reforma të rëndësishme veçanërisht në forcimin e sundimit të ligjit dhe avancimin e agjendës evropiane të vendit.
“Si njohës i mirë i realitetit të Kosovës, ai e ka trajtuar vendin tonë si një partner serioz, të përkushtuar ndaj vlerave evropiane dhe një të ardhmeje të përbashkët brenda tyre”, ka shkruar Gërvalla ku ka njoftuar se ka marrë pjesë në drekën lamtumirëse të organizuar nga Ambasada Gjermane me rastin e përfundimit të mandatit të Orav.
Gërvalla ka thënë se bashkëpunimi me Orav ka qenë veçanërisht i ngushtë, dinamik e intensiv gjatë kohës kur ajo ishte Ministre e Punëve të Jashtme.
“Prandaj dhe takimet me të ishin gjithmonë frytdhënëse dhe të drejtpërdrejta, sepse ai e kuptonte thellë Kosovën dhe kontribuonte në gjetjen e zgjidhjeve më të mira për avancimin e proceseve strategjike dhe reformave kyçe”, ka shkruar ajo në Facebook.
