Ministrja në detyrë e Punëve të Jashtme, Donika Gërvalla të enjten ka pritur në takim ambasadoren e re jorezidente të El Salvadorit në Kosovë, Rhina Bardi.
Gërvalla ka thënë se gjatë takimit ka theksuar se forcimi i lidhjeve dypalëshe është prioritet, me synimin për të krijuar partneritet të qëndrueshëm në fusha me interes të ndërsjellë.
“Gjithashtu, riafirmuam se vlera e diplomacisë kulturore dhe shkëmbimeve akademike është një mjet për forcimin e mëtejshëm të marrëdhënieve mes dy shteteve. Kosova, me rininë e saj dinamike dhe potencialin ekonomik në rritje, mbetet e angazhuar për të zhvilluar partneritete që kontribuojnë në prosperitetin e përbashkët. Në këtë kontekst, i rëndësishëm mbetet krijimi i mundësive të reja për zhvillim dhe shkëmbim ndërmjet institucioneve dhe sektorit privat të të dyja vendeve”, ka shkruar ajo në Facebook.
