Ministrja e Punëve të Jashtme, Donika Gërvalla ka thënë se Kosova dhe Serbia ende nuk kanë arritur marrëveshje.
Ajo për këtë ka lënë fajtore Serbinë, pasi sipas saj, ishte Serbia që refuzoi të nënshkruajë në dy takimet e fundit pavarësisht gatishmërisë së Kosovës.
Gërvalla ka thënë se për normalizim të raporteve është e nevojshme që Serbia të jetë serioze, por për këtë ka thënë se nuk beson shumë.
“Ne kemi nevojë që Serbia të jetë serioze për normalizimin e marrëdhënieve tona. Normalizim do të thotë sjellje normale, respektim i fqinjit dhe mos kërcënim ndaj fqinjit me luftë dhe pasoja të tjera. Prandaj është kaq e vështirë me Serbinë, ata ulen në tryezën e bisedimeve dhe premtojnë dhe pastaj vjen një Serbi krejtësisht tjetër kur bëhet fjalë për zbatimin e premtimeve. Kësaj radhe Serbia as që nënshkroi, kështu që nuk jam optimist për të pritur ndryshime në javët apo muajt e ardhshëm”, ka thënë Gërvalla në një intervistë për mediumin portugez “Diaro de Nolicias”.
Ajo folur edhe për anëtarësimin në BE të Kosovës dhe Serbisë, duke thënë se shteti fqinj nuk është intersuar për një gjë të tillë, ndërsa Kosova po punon vazhdimisht për tu anëtarësuar në BE.
“Më lejoni të jem shumë i hapur dhe i sinqertë për këtë: kjo udhëheqje serbe nuk është aspak e interesuar ta çojë vendin në BE. E tregojnë dhe e deklarojnë çdo ditë. Nëse shikojmë sondazhet, shohim se edhe njerëzit në Serbi, shumica, nuk janë pro anëtarësimit të Serbisë në BE. Çfarë do të thotë kjo për rajonin? Kjo do të thotë që të gjitha vendet tona që po bëjnë përparim, për shembull Kosova po bën përparim të madh në çështjet e sundimit të ligjit sipas standardeve evropiane, të gjitha do të duhet të presin derisa Serbia, e cila i shërben interesave të Rusisë, të ndahet nga Rusia ose të ketë rrugë ata që plotësojnë kushtet për të hyrë në Bashkimin Evropian? Besoj se edhe BE-ja nuk është shumë e sinqertë në ofertën që i bën Ballkanit Perëndimor për integrim. dhe kjo është pjesë e problemit. Nëse oferta nuk është e sinqertë, atëherë përpjekjet e rajonit nuk do të konsiderohen të mjaftueshme”, ka thënë ajo.
Gërvalla është shprehur se Kosova po punon shumë me shtetet mosnjohëse.
Ajo është pyetur edhe sa i përket qëndrimit nëse është për bashkimin e Kosovës me Shqipërinë.
“Fakti që 95% e popullit në Kosovë flasin gjuhën shqipe është një urë shumë e rëndësishme për Shqipërinë, e cila është fqinji ynë i parë dhe partneri ynë më i rëndësishëm, sepse ne ndajmë një gjuhë dhe kemi një kulturë, traditë dhe histori të përbashkët, por populli i Kosovës vendosi me pavarësinë të ndërtojë shtetin e tij sovran. Republika e Kosovës nuk po shkon askund, është një realitet, dhe ne po punojmë shumë dhe fort për të ndërtuar një shtet demokratik, të drejtë dhe të begatë që së bashku me Shqipërinë të mund të anëtarësohemi në Bashkimin Evropian në të ardhmen”, ka thënë ajo./teve1.info/
