Ministrja e Punëve të Jashtme dhe Diasporës, Donika Gërvalla ka pritur në takim ambasadorin e Mbretërisë së Belgjikës në Kosovë, Gregoire Cuvelier, me të cilin folën për anëtarësimin e Kosovës në Këshillin e Evropës dhe organizata tjera ndërkombëtare.
“Bashkëpunimi në proceset integruese të Republikës së Kosovës, mbështetja e Belgjikës në anëtarësimin e Kosovës në Këshillin e Evropës dhe organizata tjera ndërkombëtare ishin temat kyçe të takimit që Zëvendëskryeministrja dhe Ministrja e Punëve të Jashtme dhe Diasporës, znj. Donika Gërvalla, pati me ambasadorin e parë rezident të Mbretërisë së Belgjikës në Kosovë, z. Gregoire Cuvelier”, thuhet në komunikatën për medie.
Gjithashtu, ministrja Gërvalla dhe ambasadori Cuvelier folën edhe lidhur me situatën politike në vend.
“Biseda u përqendrua rreth situatës politike në vend, angazhimeve të institucioneve në siguri, demokratizim dhe zhvillim ekonomik, duke theksuar se Kosova mbetet e vendosur në ruajtjen e paqes dhe stabilitetit në rajon dhe forcimin e shtetit ligjor dhe demokracisë në vend. Ministrja Gërvalla dhe Ambasadori Cuvelier biseduan edhe për mërgatën e Kosovës në Belgjikë, bashkëpunimin në kulturë, arsim dhe shkencë si dhe mundësitë e investimeve në Kosovë”, thuhet më tej në komunikatë.
Po ashtu Gërvalla ka falënderuar Ambasadorin Cuvelier për mbështetjen e shtetit belg ndaj Kosovës.
