Ministrja në detyrë e Punëve të Jashtme dhe Diasporës, Donika Gërvalla, ka udhëtuar sot drejt Varshavës për të marrë pjesë në takimin e nivelit të lartë të ministrave të Jashtëm të vendeve anëtare të BE-së, si dhe të shteteve kandidate dhe me status kandidat potencialë.
Takimi zhvillohet në margjinat e Këshillit të Punëve të Jashtme të BE-së dhe organizohet me ftesë të Presidencës së Polonisë të Këshillit të Bashkimit Evropian.
Qëllimi i këtij forumi është të krijojë një platformë të hapur për dialog strategjik ndërmjet vendeve të BE-së dhe shteteve kandidate e me perspektivë anëtarësimi, përfshirë rajonin ballkanik, në funksion të përshpejtimit të procesit të zgjerimit dhe thellimit të bashkëpunimit politik dhe ekonomik.
Takimi vjen në një moment vendimtar për të ardhmen evropiane të Ballkanit Perëndimor dhe do të shërbejë si hapësirë për shkëmbim të ideve dhe qëndrimeve për sfidat e përbashkëta, rolin e rajonit në arkitekturën e sigurisë evropiane dhe perspektivën e përbashkët integruese.
Gërvalla do të zhvillojë takime dhe diskutime dypalëshe me homologë nga vendet e BE-së dhe vendet kandidate, ku do të diskutohet për zhvillimet në rajon, progresin e Kosovës në rrugën evropiane dhe rëndësinë e përkrahjes së vazhdueshme për shtetet demokratike dhe pro-evropiane të Ballkanit.
