Ministria e Punëve të Jashtme dhe Diasporës ka bërë të ditur se ministrja në detyrë, Donika Gërvalla, ka përfaqësuar Kosovën në takimin e dytë ministror në formatin Ukrainë-Evropa Juglindore.
Siç thuhet në njoftim, ky takim u mbajt në kuadër të Forumit të Dubrovnikut dhe u bashkëkryesua nga Ministri i Punëve të Jashtme të Ukrainës, Andriy Sibiga, dhe Ministri i Punëve të Jashtme dhe Evropiane të Kroacisë, Gordan Grlić Radman.
Sipas MPJD-së, përmes komunikatës së përbashkët të miratuar në takim, ministrat riafirmuan mbështetjen e palëkundur për Ukrainën, si dhe u ritheksua përkushtimi për një paqe të drejtë dhe të qëndrueshme.
“Tërheqja e plotë e forcave dhe pajisjeve ruse nga e gjithë territori i Ukrainës, ndalja e armiqësive dhe rikthimi i plotë i integritetit territorial të Ukrainës brenda kufijve të njohur ndërkombëtarisht mbeten thelbësore për një paqe gjithëpërfshirëse, të drejtë dhe të qëndrueshme,” thuhet në komunikatë.
