Ministrja në detyrë e Punëve të Jashtme dhe Diasporës, Donika Gërvalla, ka pritur të enjten në një takim ambasadorin e ri të Gjermanisë në Kosovë, Rainer Rudolph, të cilin e ka uruar për fillimin e mandatit të tij.
Sipas MPJD-së, Gërvalla ka theksuar angazhimin e Kosovës për thellimin e marrëdhënieve me Gjermaninë, të cilën e vlerësoi si partnere strategjike dhe aleate kyçe të vendit.
“Ministrja Gërvalla vlerësoi mbështetjen e vazhdueshme dhe të pandërprerë që Gjermania i ka dhënë Kosovës në të gjitha fazat e shtetndërtimit, si dhe në rrugëtimin e vendit drejt integrimeve evropiane dhe euroatlantike”, thuhet në njoftim.
Gërvalla gjithashtu ka nënvizuar rolin e rëndësishëm të mërgatës kosovare në Gjermani, e cila shërben si një urë lidhëse e fuqishme mes dy vendeve dhe kontribuon ndjeshëm në fushat ekonomike, shoqërore dhe kulturore.
Në takim u diskutua edhe për zgjerimin e bashkëpunimit ndërmjet Kosovës dhe Gjermanisë në sektorët e ekonomisë, sigurisë, energjisë dhe inovacionit.
Të dy palët u dakorduan për intensifikimin e investimeve dhe për nxitjen e projekteve që përfshijnë mërgatën, duke e vlerësuar këtë bashkëpunim si një faktor të rëndësishëm për zhvillimin dhe të ardhmen e përbashkët të Kosovës dhe Gjermanisë./teve1.info/
