Ministrja e Punëve të Jashtme dhe Diasporës, Donika Gërvalla sot do të merr pjesë në takimin ministror “Miqtë e Ballkanit Perëndimor”, që do të mbahet në Romë.
Sipas komunikatës së ministrisë, Gërvalla është ftuar nga Zëvendëskryeministri dhe Ministri i Punëve të Jashtme dhe Bashkëpunimit Ndërkombëtar të Italisë, Antonio Tajani, ku do të mbahen dy sesionë, temë diskutimi do të jetë integrimi i Ballkanit Perëndimor në BE, kontributi i sektorit privat, si dhe perspektiva e bizneseve italiane.
“Në fjalën e saj para homologëve nga Ballkani Perëndimor, Ministrja Gërvalla do të paraqes perspektivën e Republikës së Kosovës në procesin e integrimit në BE, progresin e arritur në demokraci, sundim të ligjit, zhvillim ekonomik, plotësimin e kritereve për anëtarësim në Bashkimin Evropian si dhe zhvillimet e fundit në Kosovë dhe rajon në fushën e sigurisë”, thuhej në komunikatë.
Sipas komunikatës, ministrja Gërvalla do të takojë homologun e saj për Punë të Jashtme dhe bashkëpunim ndërkombëtar të Italisë Antonio Tajani, dhe përfaqësues të tjerë të institucioneve qendrore të Italisë./teve1.info/
