Ministrja në detyrë e Punëve të Jashtme, Donika Gërvalla duke folur për seancën e Këshillit të Sigurimit të OKB-së, ka thënë se aty kishte një debat përmbajtjesor.
Ajo ka thënë se deklarimet në këtë seancë nga partnerët kryesor të Kosovës se dialogu me Serbinë duhet të qojë në njohje të ndërsjellët e ka bërë optimiste.
Gërvalla në një intervistë për emisionin “Këndi i Debatit” në Tëvë, ka thënë se parterët e kishin filluar të harrojnë këtë shprehje.
“Javën e kaluar isha në seancën e Këshillit të Sigurimit të OKB-së, ku patëm një debat kogja përmbajtjesor edhe me deklarata shumë të qarta prej disa partnerëve tanë më të rëndësishëm, në mos më i rëndësishmi që kemi. Kthimi i shprehjes njohje e ndërsjellë në fjalorin e partnerëve tanë, mua më bënë shumë optimiste, se patën filluar me harru, ne e përsërisnim vazhdimisht, por partnerët patë fillua me harru, që ky dialog ka kuptim vetëm nëse qon në njohje të ndërsjellë”, ka thënë Gërvalla.
Ajo ka thënë se edhe në Bashkimin Evropian meudhëheqjen e re ka ndryshim të gjuhës.
Gërvalla ka treguar një detaj se çfarë është thënë në takimin me përfaqësuesit e BE-së dhe ministrat e vendeve të Ballkanit Perëndimor, për vendet e këtij rajoni që ofrohen me Rusinë.
“Ka ndryshim të gjuhës, takimi ka qenë i mbyllur dhe unë nuk mund të them filani apo filania kanë thënë, por aty është shkuar aq larg sa që është thënë se nëse një prej shteteve të Ballkanit Perëndimor, jo vetëm që do dëshiron me shku me festu 9 Majin me Putin, por të dërgojë edhe informacione ushtarake, atëherë duhet të mendohen mirë se çka bëjnë në këtë tavolinë”, ka thënë ajo.
Gërvalla nuk ka treguar nëse do të vazhdojë ta udhëheq diplomacinë e Kosovës edhe në Qeverinë Kurti3.
“Nevojitet një seancë në Kuvend gjatë së cilës kryeministri prezanton kabinetin e ri qeveritar. Por, kurdo që ndodhë kjo unë nuk harroj detyrat e mija deri në atë moment”, ka thënë ajo.
