Ministrja e Punëve të Jashtme dhe Diasporës, Donika Gërvalla ka thënë se Kosova i ka plotësuar të gjitha kushtet për anëtarësim në Këshillin e Evropës.
Ajo tha se kjo u konfirmua edhe nga votat në Asamblenë Parlamentare të KiE-së.
“Republika e Kosovës i ka plotësuar të gjitha kushtet për anëtarësim në Këshillin e Evropës, gjë që u konfirmua me 82% të votave nga Asambleja Parlamentare e KiE-së”, thuhet në komunikatën e MPJD-së.
Gërvalla këto komente i ka bërë gjatë takimit të zhvilluar me Ministrin e Çështjeve Evropiane të Finlandës, Anders Adlercreutz të zhvilluar në Bruksel në margjina të takimit të ministrave të BE-së me ministrat e shteteve që kanë një perspektivë të anëtarësimit në BE, pra të Ballkanit Perëndimor, Turqisë, Ukrainës, Gjeorgjisë dhe Moldavisë.
“Në takim u diskutua për procesin e anëtarësimit të Kosovës në Këshillin e Evropës, sukseset e jashtëzakonshme të Kosovës në ngritjen e standardeve të demokracisë dhe shtetit ligjor, përparimin në ekonomi dhe perspektivën euroatlantike të Kosovës. Duke vlerësuar gjendjen e të drejtave të njeriut dhe atyre të komuniteteve joshumicë, ministrja Gërvalla shprehu mirënjohjen e saj për mbështetjen e vazhdueshme të Finlandës”, thuhet në komunikatë./teve1.info/
