“Republika e Kosovës është partner i vendosur i BE-së dhe do të vazhdojë rrugën e integrimeve euroatlantike me shpresë që shumë shpejt premtimet për anëtarësim të Ballkanit Perëndimor të realizohen”.
Kështu ka deklaruar ministrja e Punëve të Jashtme, Donika Gërvalla e cila po merr pjesë në takimin e Këshillit të Ministrave të Jashtëm të BE-së ku do të diskutohet për sigurinë në Evropë.
“Ne e dimë se në Ballkanin Perëndimor kemi shumë sfida në paqe dhe siguri. Së bashku me ministrat e Jashtëm, shpresoj se do të përdorim diskutimet për paqen dhe sigurinë, jo vetëm në Ballkanin Perëndimor, por edhe në të gjithë kontinentin”, deklaroi ajo.
Gërvalla përmendi rastin e 24 shtatorit, kur një grup terroristësh serb sulmuan policinë e Kosovës.
“Ju e dini se dy muaj më parë Kosova u përball me një akt agresioni të hapur nga Serbia. Presim nga ministrat e BE-së, por edhe nga strukturat e tjera të BE-së, të qartësojnë qëndrimin ndaj atij sulmi, dhe të adresojnë gjithçka që duhet bërë dhe pasojat me të cilat duhet të përballet agresori”, deklaroi ajo.
Ministrat e Jashtëm të Bashkimit Evropian do të zhvilluan sot në Bruksel një takim me homologët e tyre nga Ballkani Perëndimor ku kanë trajtuar temat e sigurisë në kontinentin më të vjetër./rtk
