Ministrja në detyrë e Punëve të Jashtme, Donika Gërvalla ka thënë se zgjerimi i Bashkimit Evropian është domosdoshmëri dhe një përgjigje konkrete nda zhvillimeve gjeopolitike.
Ajo kështu është shprehur në takimin e ministrave të Jashtëm të anëtarëve të BE-së dhe shteteve kandidate, me ftesë të Presidencës Polake të Këshillit të Bashkimit Evropian.
Zgjerimi i Bashkimit Evropian nuk është më një projekt abstrakt politik, por një domosdoshmëri strategjike, një përgjigje konkrete ndaj realiteteve të reja gjeopolitike dhe sfidave që rrezikojnë themelet e paqes dhe sigurisë evropiane. Në këtë kontekst të ri, ku arkitektura e Evropës po rikonfigurohet përballë kërcënimeve dhe sfidave të shumanshme, takimi në Varshavë përfaqëson një mundësi për të marrë vendime të guximshme dhe për të artikuluar një vizion të qartë për një Evropë më të bashkuar, më të sigurt dhe thellësisht demokratike”, ka shkruar Gërvalla në takimin ku prezentë ishte edhe Përfaqësuesja e Lartë të Bashkimit Evropian për Punët e Jashtme dhe Politikën e Sigurisë, Kaja Kallas.
Ajo ka thënë se Kosova është e përkushtuar për anëtarësim në BE dhe mbetet partnere e besueshme e Evropës.
“Kosova, si demokracia më e qëndrueshme dhe vendi më pro-evropian në Ballkanin Perëndimor, mori pjesë në këtë tryezë me qëndrime të qarta dhe me bindjen se zëri ynë është i pazëvendësueshëm për të ardhmen e rajonit. Si një shtet që ka ndërtuar institucione funksionale, ka forcuar sundimin e ligjit dhe ka dëshmuar përkushtim të palëkundur ndaj reformave dhe vlerave evropiane, Republika e Kosovës sjell përvojën e një vendi që nuk kërkon vetëm integrim, por kontribuon me përgjegjësi ndaj projektit të përbashkët evropian. Në Varshavë, riafirmojmë se Republika e Kosovës është dhe mbetet një aleate dhe partnere e besueshme e Bashkimit Evropian, një faktor stabiliteti, sigurie dhe progresi demokratik, në rajon dhe në gjithë kontinentin”, ka shkruar Gërvalla.
