Ministrja në detyrë e Punëve të Jashtme, Donika Gërvalla kërkoi nga Bashkimi Evropian gjuhë “të qartë dhe të ashpër” ndaj Serbisë, pasi presidenti serb, Aleksandar Vuçiq po zhvillon vizitë në Rusi.
Ajo tha para mediave të premten, më 9 maj, se blloku duhet të heq dorë nga “politika e ledhatimit” e cila sipas saj ka dështuar me Putinin dhe njësoj do të ndodh me Vuçiqin.
“Fakti që sot presidenti serb, Aleksandar Vuçiq ndodhet në Moskë edhe krahë për krahë me diktatorin Putin demonstron solidaritetin dhe miqësinë e tyre, është një situatë në të cilën bëjmë thirrje që BE të heqë dorë nga politika e ledhatimit e cila ka dështuar që me Putinin, edhe e cila është e destinuar të dështojë edhe me Vuçiqin. Kërkojmë nga BE që të përdorë një gjuhë të qartë, një gjuhë të ashpër, dhe të dënojë jo vetëm këtë vizitë, por edhe të dënojë të gjitha aktet e sulmet që Serbia i bënë ndaj popujve fqinje. Prandaj, në këtë kornizë mendoj se nuk kemi kohë për të humbur, unë mendoj që është koha që opozita t’i thërras mendjes edhe të mos bllokojë më procese të cilat nuk është momenti për t’i bllokuar. Nëse nuk janë dakord me qeverinë dhe kryeministrin vjen momenti për ta shprehur këtë mungesë dakordimi dhe ai është momenti kur votohet për qeverinë“, tha ajo.
Aleksandar Vuçiq po qëndron në Moskë – pavarësisht kundërshtimeve të Bashkimit Evropian – për të marrë pjesë në shënimin e Ditës së Fitores në Luftën e Dytë Botërore.
