Ministrja në detyrë e Punëve të Jashtme, Donika Gërvalla e ka quajtur inskenim të gërditshëm të kryeprokurorit të Prokurorisë Speciale (PSRK), Blerim Isufajt, intervistimin e së martës të ministrit në detyrë të Bujqësisë, Faton Peci.
Sipas Gërvalles, kjo është një hakmarrje e shëmtuar ndaj betejës së Pecit kundër korrupsionit dhe guximit të tij për t’u ballafaquar me secilën shkelje të ligjit ‘pa marrë parasysh se sa të rrezikshëm janë shkelësit dhe sa shumë shokë e ortakë kanë në Prokurorinë Speciale’.
Megjithatë, ajo ka shtuar se nuk do të ketë kthim prapa deri në në reformimin e plotë edhe të sistemit të drejtësisë.
“Kur pikërisht ata që e kanë për detyrë ta mbrojnë shtetin ligjor dhe qytetarët e Republikës nga krimi i keqpërdorin organet e drejtësisë për hakmarrje dhe për të njollosur figurat e suksesshme dhe të pastra politike, atëherë asgjë më nuk duhet të na habisë. Por, kthim prapa nuk ka. Deri në reformimin e plotë edhe të sistemit të drejtësisë”, ka shkruar ajo në Facebook.
Ministri në detyrë i Bujqësisë, Faton Peci, prej disa orësh është duke u intervistuar nga Prokuroria Speciale pas bastisjes që Policia e Kosovës të martën ka kryer në katër lokacione të Ministrisë së Bujqësisë.
Sipas zëdhënëses së Prokurorisë Arbnora Luta, Peci po intervistohet në cilësinë e të dyshuarit për dhënien në shfrytëzim të Fabrikës për përpunimin e nënprodukteve shtazore.
Prokuroria Speciale po e interviston Pecin në cilësinë e të dyshuarit
