Fjalë të mëdha pati për vendlindjen e babait.
“Sa herë vij këtu në Dubovik, më duket babain e mixhallarët e mi duke kënduar e kuvenduar nën hijen e pemëve”, ka thënë ministrja, Donika Gërvalla-Schwarz.
Por, këto epitete ish-kryediplomatja e Kosovës, nuk i pati për një tjetër figurë të shquar të luftës së fundit në Kosovë.
“Heroi i Qakorrit, Kosova në NATO nuk hyn me gjeneral të vetëshpallur”, ka thënë ajo.
E të papranueshme këtë gjuhë kundër ish-komandantit të Zonës Operative të Dukagjinit, po e cilësojnë në Organizatën e Veteranëve të Luftës.
“Rasti i fundit që ndodhi me ish-kryeministrin apo gjeneralin Haradinaj, që është një turp i madh të fyhet kjo familje, kur ne e dimë që i ka dy anëtar të vrarë dhe me 24 mars të vitit 1998, e tërë familja kanë qenë në luftë me çetnikët serb në Gllogjan. E sot të çohet Donika Gërvalla t’i fyej gjeneralin Ramush Haradinaj, ky është turpi më i madh në fushatë, për një grusht vota. 3:08 Është mirë me dal me sqarua këtë deklaratë, me dal me bë një kërkim falje para qytetarëve të Republikës së Kosovës. Por, ne Donikën e njohim, është kjo që ka deponuar dokumentacione në Serbi, kundër Ushtrisë Çlirimtare të Kosovës”, ka thënë kryetari i OVL-UÇK-së, Hysni Gucati.
E analistët politik thonë se përdorimi i një gjuhë e tillë kundër kundërshtarëve politik, nuk i bën dobi askujt.
“Kjo nuk i bën nder asnjë shqiptari, veçmas dikujt që ka bartur përgjegjësi shtetërore, siç është ministresh e punëve të jashtme dhe zv/kryeministrja. Ajo dhe secili njeri tjetër që ka pasur pushtet, gjatë fushatës elektorale duhet t’u tregojnë qytetarëve se çfarë kanë bërë gjatë këtyre katër viteve dhe çfarë iu ofron qytetarëve. Por, nëse mendon që këta komandant do duhej të shpalleshin dhe kush do duhej t’i shpallte, nuk do të ishte dëshmor as babai i saj, as Adem Jashari dhe shumica e këtyre dëshmoreve. Këta i kanë shpallur komandantë e gjeneral, shokët e luftës“, ka deklaruar analisti politik, Ali Sefaj.
E emri i Ushtrisë Çlirimtare të Kosovës, nuk po mungon as në këtë fushatë zgjedhore.
Për këtë arsye po kërkohet që të sa më shpejt të ketë një ligj për mbrojtjen e vlerave të luftës.
„Pse e përdorin emrin e UCK-së neve nuk na pengon, gjithmonë flas kur përdoret për të mirë, sepse ne i kemi pjesëtarët e UÇK-së në të gjitha partitë politike, por kur përdoret emri i UÇK-së për me na fye, me na shajtë, nuk është mirë, sepse kjo bëhet në mungesë të ligjit, sepse s’ka ligj për mbrojtjen e vlerave të luftës“, ka deklaruar Gucati.
“Në rast se kjo përdoret si vlerë për të promovuar të mira brenda shoqërisë dhe unitet dhe për të garantuar që secili subjekt në rast fitoreje, do ta ngrit në një piedestal më të lartë dhe do ta nxjerr ligjin për mbrojtjen e vlerave të luftës, do të ishte e mirëseardhur. Por nëse përdoret vetëm për vota apo përfitime të ndonjë grupi të caktuar, edhe nëse ata kanë qenë pjesë e UCK-së, nuk do të ishte e drejtë”, ka deklaruar Sefaj.
Ndryshe, fushata zgjedhore do të zgjas deri 8 shkurt, ndërsa një ditë më pas do të mbahen zgjedhjet e rregullta parlamentare në Kosovë.
