Ministrja në detyrë e Punëve të Jashtme të Kosovës, Donika Gërvalla ka reaguar pas deklarimve të kreut të Kishës Ortodokse Serbe, Porfirije i cili i tha se nuk e di se çfarë do të ndodhte me Kosovën po të mos ishte Serbia.
Gërvalla ka thënë se këto qëndrime nuk janë të reja dhe se Kisha Ortodokse Serbe ka qenë historikisht pjesë e ideologjive nacionaliste që ushqyen luftërat në rajon.
“Kreu i Kishës Ortodokse Serbe, Porfirije, vetëm disa ditë pasi iu lejua vizita në Kosovë, u shfaq në Moskë përkrah Presidentit rus Putin, duke bërë deklarata që cenojnë sovranitetin e Kosovës dhe nxisin përçarje në gjithë rajonin. Këto qëndrime nuk janë të reja. Kisha Ortodokse Serbe ka qenë historikisht pjesë e ideologjive nacionaliste që ushqyen luftërat në Kroaci, Bosnje e Hercegovinë dhe Kosovë në vitet ’90. Për fat të keq, ajo trashëgimi vazhdon edhe sot, përmes deklaratave që ofendojnë fqinjët, mohojnë realitetin dhe përpiqen të destabilizojnë Ballkanin”, ka shkruar Gërvalla.
Gërvalla ka thënë se Kosova është e përkushtuar për paqe, dialog e bashkëpunim.
Ajo ka thënë se BE nuk duhet të heshtë ndaj këtyre deklarimve.
“Kosova është e përkushtuar për paqe, dialog dhe bashkëpunim. Ne jemi të gatshëm të punojmë me udhëheqës politikë e fetarë që ndërtojnë ura mes njerëzve, kombeve dhe besimeve. Shpresojmë sinqerisht që një ditë, edhe në krye të Kishës Ortodokse Serbe, të kemi një partner të tillë për të ardhmen. Presim reagim të qartë nga Bashkimi Evropian, si ndërmjetësues i dialogut Kosovë–Serbi. Heshtja ndaj deklaratave që minojnë paqen dhe nxisin urrejtje nuk është neutralitet — është normalizim i gjuhës së urrejtjes. Kosova do të vazhdojë të mbrojë vlerat evropiane dhe paqen në rajon, me përgjegjësi dhe vizion të qartë për të ardhmen”, ka shkruar Gervalla në Facebook.
Porfirije-Putinit: Pa mbështetjen tuaj nuk e di se çfarë do të ndodhte me Kosovën
