Ministrja në detyrë e Punëve të Jashtme të Kosovës, Donika Gërvalla shpreson që në kryesimin e BE-së nga Danimarka nga korriku i këtij viti do të zhbllokohet procesi i anëtarësimit të Kosovës në BE.
Ajo pas një takimi që ka zhvilluar me ministrin e Jashtëm të Danimarkës, Lars Løkke Rasmussen ka thënë se Kosova i ka përmbushur detyrimet dhe është e gatshme për këtë proces.
“E njoftova Ministrin Rasmussen se integrimi evropian i Kosovës nuk mund të mbetet peng i status quo-së. Në prag të marrjes së Presidencës së Këshillit të BE-së nga Danimarka në korrik 2025, shpreha bindjen se roli i saj është i domosdoshëm për të zhbllokuar procesin e statusit të kandidatit për Kosovën. Republika e Kosovës i ka përmbushur detyrimet dhe është e gatshme të ecë përpara, me bindjen se roli aktiv i miqve tanë mund të bëjë dallimin për ta zhbllokuar këtë proces”, ka shkruar Gërvalla në Facebook.
Ajo poashtu ka thënë se Kosova duhet të anëtarësohet në Këshillin e Evropës
“Po ashtu, theksova se tani është momenti i duhur për të përmbyllur anëtarësimin e Kosovës në Këshillin e Evropës. Kjo nuk është vetëm një çështje politike, por një angazhim për vlera të përbashkëta, ku Kosova është e gatshme të japë kontributin e saj si pjesë e familjes evropiane”, ka thënë Gërvalla.
Ajo ka vlerësuar se marrëdhëniet me Danimarkën janë të shkëlqyera dhe mbeten një bazë e fortë për të thelluar bashkëpunimin në fusha me interes të përbashkët.
