Ekipet e Komisionit Qeveritar për Persona të Zhdukur, Instituti i Mjekësisë Ligjore dhe Drejtoria e Policisë për Hetimin e Krimeve të Luftës, gjatë javës kanë kryer disa gërmime me ç’rast kanë gjetur mbetje mortore në dy lokacione.
Gjatë së enjtës në Prekaz të poshtëm të Skenderajt, pas gërmimeve u zhvarrosën mbetje mortore të tre individëve të cilët dyshohet se janë nga lufta e fundit në Kosovë.
Ndërsa gjatë së premtes, gërmimet vazhduan edhe në Tusuz të Prizrenit ku u gjetën mbetje mortore potencialisht të viktimave të luftës, lokacion i cili është i trembëdhjeti gjatë këtij viti brenda territorit të Republikës së Kosovës.
Kryesuesi i Komisionit Qeveritar për Personat e Zhdukur, Andin Hoti, i ftuar në “InfoNata” në Tëvë1 bëri të ditur se do të zgjerohet perimetri në kanale të tjera për gërmime.
“Në ditët në vijim do të zgjerojmë perimetrin edhe në dy kanale të tjera që do të bëhen gërmimet. Informatat janë të shumta që mundemi me i marrë. Në Prekaz aktualisht i kemi marrë prej Kryqit të Kuq Ndërkombëtar. Kryqi i Kuq Ndërkombëtar, deri më tani ka pasur dy hulumtues në Hagë, të cilët kanë hulumtuar arkiva të Tribunalit të Hagës, në të njëjtën kohë janë duke hulumtuar edhe arkivat e UNMIK-ut, edhe arkivat e EULEX-it që kanë operuar në Kosovë edhe këto raporte, këto informata pastaj duke i përfshirë edhe dëshmitarë të ndryshëm natyrisht”, tha Hoti.
Ndërkohë, pas 2 vitesh kërkesash e takimesh në mes të nëngrupeve punuese të Republikës së Kosovës dhe Serbisë, të ndërmjetësuara nga Komiteti Ndërkombëtar i Kryqit të Kuq, gërmimet e nisura në maj të vitit 2021, përkundër paqartësive, kanë rifilluar në lokacionin e quajtur Shtavalj, Sienicë, në teritorin e Serbisë.
E lidhur me këtë kryetari i këshillit të familjeve të të zhdukurve, Ahmet Grajçevci thotë se sipas imazheve satelitore dyshohet se aty ka varreza masive.
“Në Shtavel është mirë që të gërmohet sepse aty supozohet dhe dyshohet që ka varreza massive aty, sepse Serbët nuk e kanë pranu asnjëherë se ka, por imazhet satelitore i kanë tregu në bazë të dëshmitarëve që aty ka varrezë massive”, tha Grajçevci.
Mbi 1.600 persona vazhdojnë të jenë ende të zhdukur.
