Në këtë hapësirë brenda burgut të Dubravës gjatë luftës së fundit në Kosovë krime të rënda u kryen ndaj shqiptarëve nga gardianët serbë.
Ndërkaq, vetëm disa ditë pas përfundimit të luftës një dëshmitar ka treguar se e ka gjetur një person të vdekur në këtë lokacion që është brenda perimetrit të burgut ku edhe më pas e kishte varrosur.
Dëshmitari këto informata ia ka dhënë Policisë së Kosovës.
E, pikërisht në vendin ku dyshohet se ka mbetje mortore, ekipet e Institutit të Mjekësisë Ligjore me autorizim të Prokurorisë Speciale kanë nisur gërmimet.
“Sipas dëshmitarit, një person ishte gjetur në pjesën e malit disa ditë pas luftës. Pa ndihmën e askujt, dëshmitari e kishte varrosur në një lokacion që tani është brenda perimetrit të burgut. Ai na e ka treguar vendin dhe bazuar në dëshminë e tij, janë duke u zhvilluar gërmimet”- ka deklaruar Morina.
Kurse, Kushtrim Gara nga Komisioni Qeveritar për Personat e Zhdukur ka njoftuar se rasti i Dubravës është çështje me prioritet ndërsa ka bërë të ditur se gjatë këtij viti kanë gërmuar në 10 lokacione të ndryshme brenda territorit të Kosovës.
“Padyshim që rasti i Dubravës mbetet një nga rastet që do të trajtohet me prioritet. Jemi në komunikim të vazhdueshëm me familjarët e viktimave të masakrës së Dubravës në mënyrë që të marrim më shumë informacione. Ky është lokacioni 10-të me radhë që po trajtohet brenda këtij viti” – ka thënë Gara.
Pavarësisht gërmimeve më orë të tëra, ekipet e mjekësisë nuk kanë gjetur mbetje mortore ndërsa procesi i kërkimit do të vazhdojë në ditët në vijim.
Kur po bëhen gati 26 vjet nga përfundimi i Luftës në Kosovë mbi 1.600 persona shumica shqiptarë mbesin akoma të zhdukur.
Pavarësisht insistimit të institucioneve të Kosovës dhe ndërmjetësve ndërkombëtarë, Serbia refuzon t’i hap arkivat shtetërore.
