Deputeti i Partisë Demokratike të Kosovës, Xhevahir Geci, ka kritikuar vendimin e presidentes Vjosa Osmani për caktimin e datës 28 dhjetor për mbajtjen e zgjedhjeve të jashtëzakonshme parlamentare, duke theksuar se kjo datë është e përshtatshme për Lëvizjen Vetëvendosje dhe presidenten.
Në emisionin “Ditari” në Tëvë1, Geci ka shpjeguar se preferenca e PDK-së kishte qenë data 21 dhjetor për disa arsye, përfshirë faktin se ajo datë do të binte në prag të festave të fundvitit, një periudhë që mund të lehtësonte mobilizimin e votuesve.
Sipas Gecit, ky propozim i PDK-së dhe partive tjera u refuzua nga presidentja, e cila më pas vendosi për datën 28 dhjetor.
“Preferenca jonë më e madhe dhe më adekuate ka qenë data 21 dhjetor, pasi në atë kohë jemi në prag të festave të fundvitit. Kështu që ne si PDK e kemi vlerësuar se data më e përshtatshme do të ishte 21, por fatkeqësisht ky propozim nuk kaloi tek presidentja. U mor një vendim që ndoshta nuk është më i miri i mundshëm, por sidoqoftë, ne duhet ta pranojmë edhe këtë datë dhe të mobilizohemi për zgjedhje”, ka thënë Geci.
Ai gjithashtu ka shtuar se, megjithëse PDK-ja nuk e mbështet datën e caktuar nga presidentja, do të angazhohen plotësisht për zgjedhjet dhe do të bëjnë përpjekje maksimale që të dalin fitues, duke theksuar se nuk do ta bojkotojnë procesin zgjedhor.
“Nuk do ta bojkotojmë, por do të jemi ata që do të tregojmë shembull dhe të organizohemi më mirë dhe më fuqishëm, që PDK-ja të dalë më e fuqishme nga zgjedhjet”, ka deklaruar Geci.
I pyetur nëse mendon se vendimi i presidentes ka qenë i ndikuar politikisht, Geci është shprehur se kjo ka qenë një çështje moskordinimi dhe një preferencë politike e presidentes, e cila nuk ka marrë parasysh vlerësimin e PDK-së për datën më të përshtatshme.
“Kjo është gjithçka një moskordinim, ashtu siç preferon dikush tjetër, dhe asgjë tjetër. Ne e kemi bërë vlerësimin si PDK që data më adekuate do të ishte 21, por përndryshe qytetarët që do të vijnë nga mërgata janë votues edhe të partisë sonë, edhe të tjerave, e jo vetëm të VV-së. Kështu që data 28 nuk do të shihet si hendikep për PDK-në”, ka përfunduar ai.
Ndryshe, presidentja e Kosovës, Vjosa Osmani, tha se ka vendosur që zgjedhjet e jashtëzakonshme në vend të mbahen më 28 dhjetor, pasi shpërndau Kuvendin e Kosovës, i cili nuk arriti të zgjidhte një qeveri të re pas zgjedhjeve parlamentare të 9 shkurtit.
Gjatë një konference për media, pas takimit që mbajti me përfaqësuesit e partive politike, Osmani tha se tetë parti ishin për mbajtjen e zgjedhjeve në atë datë, ndërsa pesë për 21 dhjetorin, dhe se tri parti thanë se cilado datë do të ishte në rregull për to.
“Zgjedhjet lokale nuk kanë përfunduar akoma sa i përket procedurës së certifikimit. Para fillimit të fushatës janë një sërë veprimesh, që janë regjistrimi i subjekteve dhe koalicioneve, certifikimi i kandidatëve, hedhja e shortit e veprime të tjera. Për më tepër, duhen së paku dy javë kohë për të mundësuar votimin jashtë vendit dhe sipas ligjit, shtetasve që jetojnë jashtë vendit duhet dhënë së paku 15 ditë afat me qëllim të aplikimit dhe regjistrimit për të votuar”, tha Osmani.
Ajo shtoi se janë edhe procedura të tjera të nevojshme, si ato tenderuese, që e bëjnë të pamundur mbajtjen e zgjedhjeve më herët, në datën 21 dhjetor.
“Në mesin e këtyre janë edhe procedura tenderuese e çka jo tjetër. Pra, të gjitha këto e bëjnë praktikisht të pamundshme edhe datën 21 dhjetor, rrjedhimisht data 28 dhjetor është data që kam vlerësuar se mbetet data e vetme e mundshme, sado që edhe kjo datë paraqet deri diku sfida për Komisionin Qendror të Zgjedhjeve”, shtoi Osmani teksa arsyetoi vendimin e saj për datën 28 dhjetor.
Osmani tha se si presidente e Kosovës e ka për detyrë “të jap afatin më të gjatë e jo më të shkurtër që të eliminojmë disa nga sfidat e organizimit të shpejtë të zgjedhjeve”./teve1.info/
