Donika Shahini-Lami, ish-koordinatorja e televizionit publik japonez për Kosovë në kohën kur u krye masakra ndaj familjes Jashari në Prekaz, ka rrëfyer momentet e saj teksa po qëndronte në kullën e Jasharëve pas masakrës.
Ajo tha se pasi u fut aty bashkë me dy kolegë të tjerë, kishte parë një fanellë të përgjakur e cila e kishte tronditur emocionalisht.
“Ecnim në shtëpi duke dashur të filmonim dhe duke dashur të shihnim se ku kanë qëndruar dhe prej ku është mbrojtur një familje e tërë. Gjatë rrugës teksa po i kalonim dhomat e shoh Masaton [v.j kolegu gazetar japonez] teksa e merr një faturë të rrymës elektrike, në të shkruante emri i Shaban Jasharit. Unë i them çfarë të duhet, ai më thotë që për ta realizuar storien. Afër faturës Masato e gjen edhe një kukull të vogël. Shumë afër saj unë shoh një fanellë të një fëmiu të vogël. Një fanellë e përgjakur. Me të thënë të drejtën nuk e di pse nuk kam pëlcit në vaj, por e di që jam mpirë e tëra. Kam shikuar nga Masato dhe ai më thotë, Donikë a është kjo arma, a është kjo arma e terroristëve, a mundet një kukull me qenë arma e këtyre terroristëve”, ka rrëfyer ajo për emisionin “Ditari” në Tëvë 1.
Tutje ajo rrëfen se si kolegu japonez e kishte porositur që ta kthente kukullën tek dikush prej familjes Jashari, nëse veç dikush kishte shpëtuar.
“Fakti që e kisha memoru edhe fanellën mbeta e shtangur, në atë gjendje ai më sheh dhe thotë Donikë të lutem, duhesh të jesh e fortë dhe më premto se një ditë kur të mbarojë lufta ti do ta kthesh këtë kukull në këtë familje, nëse dikush nga pjesëtarët e familjes Jashari ka shpëtuar, sepse jam i bindur që jeta do të vazhdojë sërish dhe ju do ta shijoni lirinë”, tregoi ajo.
Shahini-Lami ka thënë se prej asaj kohe e ruan një fletore ku janë emrat e anëtarëve të familjes dhe disa vizatime.
“Kemi filmuar disa sekuenca të tjera dhe jemi kthyer sërish në Prishtinë për ta punuar storien dhe për ta dërguar atë në Tokio. Gjëja që e ruaj me shumë fanatizëm dhe shumë dashuri është një fletore. Unë atë e shoh si fletore dhe e marr por nuk e shfletoj. Bashkë më kukullën e mbaja në dorë. Në të shënohen emrat e fëmijëve të Jasharëve”, tha ajo.
