Gazetari nga Maqedonia, Fitim Kryeziu, e ka quajtur sihariq të mirë udhëheqjen e përkohshme të Qeverisë së Maqedonisë nga shqiptari Talat Xhaferi, raporton teve1.info
Në emisionin “indo-Nata” në Tëvë1, Kryeziu ka thënë se megjithëse ky post është i përkohshëm, është një ditë historike që shqiptarët ta kryesojnë qeverinë maqedonase.
“Edhe pse do të jetë një qeveri teknike për 3 muaj me kompetenca për të organizuar zgjedhjet e parakohshme dhe jo program zhvillimor, do të jetë një sihariq i mirë, diçka e re për Maqedoninë dhe ditë historike se shqiptarët për herë të parë do të kenë edhe kryeministrin shqiptar”, tha Kryeziu.
Ai megjithatë tha se në Maqedoni ka filluar të ndryshoj pikëpamja e qytetarëve dhe se kjo është një praktikë e re e cila sipas tij po bëhet një normalitet i ri duke larguar dallimet e mëdha në mes të maqedonasve dhe shqiptarëve.
Talat Xhaferi, udhëheqës i Kuvendit të Maqedonisë, nga 28 janari i vitit 2024 pritet ta kryesoj Qeverinë maqedonase për 3 muaj në një qeveri teknike që do të ketë mandat organizimin e zgjedhjeve të parakohshme në këtë shtet.
