Gazetari i Tëvë1, Fidan Zejnullahu, është nderuar me mirënjohje nga stafi i radios “Kosova e Lirë”, për kontributin e tij në rindërtimin e bunkerit të luftës.
Në përurimin e këtij bunkeri, me rastin e 21 qershorit, ditës kur u transmetua emisioni i fundit në kushte lufte të kësaj radioje, para qindra të pranishmëve, ish-moderatori i kësaj radioje, Nusret Pllana, në emrin e stafit të radios, ka ndarë mirënjohje dhe falënderim të veçantë, për gazetarin Zejnullahu.
“Fidan Zejnullahu është sebep siç thotë populli, për rregullimin e bunkerit dhe ngritja e kësaj antene gjigante. Atëherë ishte gazetar në T7, e tash gazetar në Tëvë1. Kur e pa në këtë gjendje kaq të mjerueshme bunkerin, më thirri më tha, profesor po shkojmë në vend të ngjarjes dhe po e xhirojmë pak dhe me trego se bash deri në këtë ditë ka ardh bunkeri. Pastaj erdhi e bëri një storie aq të mirë, saqë pati miliona shikime dhe u bë shumë virale, pastaj me kronika na përcjelli rregullisht, prandaj faleminderit deri në qiell, Fidan Zejnullahu.” – tha Pllana para të pranishmeve.
Ndryshe, Fidan Zejnullahu, tri vjet me parë ishte i pari që e realizoi një kronikë të titulluar “Zëri që doli nga bunkeri”, e cila shpërfaqte gjendjen e mjerueshme në të cilën ishte lënë bunkeri, nga ku për tre muaj me radhë ishin dhënë lajmet me të rëndësishme të luftës. Pas kësaj, Zejnullahu dhe Tëvë1 për një vit të tërë realizuan dhjetëra kronika, që kishin të bënin me punën e radios gjatë luftës dhe përcjelljen e punimeve.
