Pritshmëritë prej të parit të qeverisë gjermane janë të mëdha. Rendimenti i udhëtimit, megjithatë, mund të jetë i pakët. Por për këtë nuk është faji i kancelarit, sa i politikës së bllokuar të Evropës në Ballkan, shkruan Frankfurter Allgemeine.
Fakti që Scholz e nis udhëtimin në Prishtinë dhe vetëm më pas udhëton për në Beograd, është shumë i rëndësishëm për Kosovën. Ministrja e Jashtme, Annalena Baerbock bëri të njëjtën gjë: fillimisht Prishtina, pastaj Beogradi.
Detaje të tilla i kushtohet vëmendje në Ballkan. Por pritshmëritë kosovare nga kancelari gjerman janë përndryshe të larta, ndoshta shumë të larta. Kosovarët shpresojnë në dy gjëra në veçanti nga Berlini: mbështetje për liberalizimin e vizave që është kërkuar me vite të tëra dhe për aplikimin e fundit të anëtarësimit në Këshillin e Evropës.
Sa i përket liberalizimit të vizave, në Kosovë ka shpresë se pas zgjedhjeve parlamentare në Francë më në fund do të ketë një përparim dhe kosovarët do të lejohen të udhëtojnë lirshëm në vendet e Bashkimit Evropian nga viti 2023. Vendi i ka përmbushur kërkesat teknike prej vitesh, por është bllokuar për arsye politike.
Për Kosovën dhe qeverinë e kryeministrit, Albin Kurti, heqja e vizave do të ishte një sukses i madh.
Megjithatë, jo vetëm në Francë ka frikë se shumë shqiptarë të Kosovës mund të abuzojnë me largimin e vizave, duke aplikuar për azil. Por në Prishtinë janë siguruar se ky rrezik nuk është real.
Së pari, ka marrëveshje ripranimi – qeveria do të marrë përsëri të gjithë aplikantët pa vonesë të mëtejshme. Së dyti, përvoja me liberalizimin e vizave për shtetet e tjera të Ballkanit, e cila hyri në fuqi në vitin 2009 dhe 2010, tregon se një rrezik i tillë nuk do të shfaqet në planin afatgjatë.
Në çdo rast, banorët e Prishtinës dëshirojnë që kancelari të angazhohet qartë për udhëtimin pa viza.
Në çështjen tjetër, përkrahja gjermane për aplikimin e Kosovës për anëtarësim në Këshillin e Evropës, ndërkohë në prapaskenë pati disa mosmarrëveshje mes Berlinit dhe Prishtinës. Nga Prishtina mësohet se në Ministrinë e Jashtme janë ngritur shqetësime se tani “nuk është koha e duhur” për të aplikuar për anëtarësim. Kosovarët e kanë dëgjuar këtë prej vitesh.
“Edhe pas aneksimit rus të Krimesë, na u tha se tani nuk ishte koha e duhur për të aplikuar. Nëse veprojmë sipas këshillave të tilla, atëherë koha nuk është kurrë e duhur”, thotë një diplomat kosovar.
Matematikisht, ka një shumicë në Këshillin e Evropës për aplikimin kosovar – të paktën nëse të gjitha shtetet që e kanë njohur pavarësinë e Kosovës votojnë edhe për pranimin e shtetit më të ri evropian në Këshillin e Evropës. Pas përjashtimit të Rusisë, më në fund ka ardhur koha e anëtarësimit të Kosovës, thonë në Prishtinë.
Megjithatë, planet e tjera kosovare kanë pak shanse për sukses. Kjo vlen për aspiratat e Kosovës për t’u përfshirë në programin parahyrës në NATO “Partneriteti për Paqe” dhe aq më tepër për spekulimet për paraqitjen e një aplikacioni për anëtarësim në BE të Republikës së Moldavisë dhe Gjeorgjisë, sipas shembullit të Ukrainës.
