Sekretari i Përgjithshëm i OKB-së, Antonio Guterres bëri një paralajmërim të martën për katastrofën humanitare që po shpaloset në Rripin e Gazës, ndërsa denoncoi bllokadën e Izraelit ndaj ndihmës humanitare.
“Ka kaluar më shumë se një muaj i tërë pa një pikë ndihme në Gaza. Pa ushqim. Pa karburant. Pa ilaç. Nuk ka furnizime komerciale. Ndërsa ndihmat janë tharë, portat e tmerrit janë rihapur. Gaza është një fushë vrasjesh dhe civilët janë në një lak të pafund vdekjeje”, tha Guterres në një konferencë shtypi në selinë e OKB-së në Nju Jork.
Guterres përmendi Konventën e Gjenevës, e cila detyron fuqinë pushtuese të bëj sigurimin e ushqimit, kujdesit mjekësor dhe shërbimeve shëndetësore publike.
Guterres shpjegoi se ligji ndërkombëtar kërkon që Izraeli të pajtohet me planet e ndihmës dhe të lejojë që ndihma të arrijë popullsinë civile në Gaza, raporton Anadoly.
Megjithatë, ai tha se “asgjë nga këto nuk po ndodh sot”.
“Asnjë furnizim humanitar nuk mund të hyjë në Gaza. Ndërkohë, në pikat e kalimit, furnizimet me ushqime, ilaçe dhe strehim po grumbullohen dhe pajisjet jetike janë bllokuar,” theksoi ai.
Ai theksoi nevojën për të mbrojtur “heronjtë” e personelit humanitar në Gaza, që po rrezikojnë jetën e tyre për të ofruar ndihmë.
“Dua të them një fjalë të veçantë për ata heronj humanitarë në Gaza. Ata janë nën zjarr dhe megjithatë bëjnë gjithçka që munden për të ndjekur rrugën që zgjodhën – për të ndihmuar njerëzit,” tha ai.
Ai kërkoi përgjegjësi dhe një hetim të pavarur për vrasjen e punëtorëve humanitarë, duke përfshirë personelin e OKB-së.
Duke u bërë thirrje vendeve anëtare të OKB-së që të respektojnë detyrimet e tyre, Guterres tha se “duhet të ketë drejtësi dhe përgjegjësi kur nuk e bëjnë”.
