Shefi i Grupit Parlamentar të Lidhjes Demokratike të Kosovës, Arben Gashi ka thënë se Koroporata Energjetike e Kosovës ka lidhur kontrata të pafavorshme që sipas tij kanë dëmtuar buxhetin e ndërmarrjes.
Sipas Gashit, në KEK ka individ të cilët janë pa rol formal, ku kanë ndikuar në dhënien e tenderëve, si dhe punësimeve të jashtëligjshme.
Madje, ai ka treguar se partia e tij ka bërë kallëzim penal për punësimet në këtë ndërmarrje.
“KEK-u ka lidhur kontrata të pafavorshme që kanë dëmtuar buxhetin e ndërmarrjes. Ka vendime të formës së prerë nga gjykata lidhur me tregtinë e energjisë, ku dëmi llogarit qindra miliona euro. Raportet tregojnë se individ pa rol formal në KEK kanë ndikuar në dhënien e tenderëve, punësime të jashtëligjshme dhe tregtinë e energjisë elektrike – duke shkaktuar favorizime dhe shkatërruar integritetin institucional. Ne si LDK kemi bërë kallëzim penal për punësimet”, ka deklaruar Gashi.
Tutje, Gashi ka kërkuar nga Qeveria dhe Bordi i KEK-ut që të raportojnë për kontratat e shitblerjes së energjisë elektrike për vitet 2021 – 2024.
Gjithashtu, ai ka kërkuar që Bordi dhe Qeveria të raportojnë çdo tre muaj për situatën në KEK.
“Kërkohet nga Qeveria dhe Bordi i KEK-ut të raportojnë për kontratat e shitblerjes së energjisë elektrike për vitet 2021 – 2024. Të rishikojnë kontratat organet përkatëse dhe të mbrojnë interesin publik. Autoritetet të hetojnë ndërhyrjen e personave të paautorizuar. Të merren masa konkrete. Bordi i KEK-ut ta rrisë transparencën në të gjitha proceset e prokurimit. Qeveria ta përmirësojë gjendjen në KEK, duke vendosur bord të pavarur dhe efikas. Bordi dhe Qeveria të raportojnë çdo tre muaj për situatën në KEK”, ka thënë Gashi, duke përshkruar atë që përmban rezoluta e propozuar./teve1.info/
