Avokati, Tomë Gashi, ka komentuar rastin e nënkryetares së Komunës së Zveçanit, Natasha Tomaniq, e cila dyshon se serbët ia kanë djegur lokalin e punës.
Gashi thotë se djegia e lokalit të nënkryetares vjen si pasojë që serbët lokalë kanë pranuar të punojnë dhe t’i pranojnë institucionet e Kosovës.
“Nënkryetarja po thotë që ia kanë djegë serbët, sepse kjo po i pranon Republikën e Kosovën, po i pranon institucionet e Kosovës dhe po pranon me qenë nënkryetare, ku kryetar e ka një shqiptar edhe po deklaron që ia kanë djegë lokalin pas 25 viteve të çlirimit… Kanë ndikuar që me u punësua serbët lokalë në institucionet e Republikës së Kosovës”, tha ai në emisionin “Info Nata” në Tëvë1.
Situata të ngjashme si kjo e Tomaniqit, Gashi thotë se rezultojnë që serbët po i dëmtojnë vetë serbët.
“Kur vijnë në situata të tilla atëherë po i bie që serbët po i dëmtojnë vetë serbët dhe kjo situatë është e rëndë. Në këtë rast kemi të bëjmë vetëm me një rast individual, por në përgjithësi ata janë shumë herë, shumë fish më të sigurtë dhe më të lirë sesa që kanë qenë para dy vitesh”, shtoi avokati.
Gjatë ditës së sotme, nënkryetares së Komunës së Zveçanit, Natasha Tomaniq iu dogj lokali i punës. Ajo dyshon se mbrapa kësaj janë përfaqësuesit e Listës Serbe derisa ka thënë se kjo gjë nuk e ndal për vazhdimin e punës për institucionet e Kosovës./teve1.info/
