Zëvendësministrja në detyrë e Punëve të Jashtme dhe Diasporës së Republikës së Kosovës, Liza Gashi, gjatë vizitës së saj zyrtare në Francë, ka zhvilluar një takim me ministren e deleguar pranë Ministrit francez për Evropën dhe Punët e Jashtme, Éléonore Caroit, e cila është përgjegjëse për Frankofoninë, Partneritetet Ndërkombëtare dhe Shtetasit francezë që jetojnë jashtë vendit.
Sipas njoftimit të Ministrisë së Punëve të Jashtme dhe Diasporës (MPJD), takimi është zhvilluar në një atmosferë miqësore dhe bashkëpunuese, duke reflektuar marrëdhëniet e ngushta dhe të qëndrueshme ndërmjet Kosovës dhe Francës.
“Takimi u zhvillua në një atmosferë miqësore dhe bashkëpunuese, duke reflektuar marrëdhëniet e ngushta dhe të qëndrueshme ndërmjet Kosovës dhe Francës”, thuhet në njoftimin e MPJD-së.
Në qendër të diskutimeve ka qenë thellimi i bashkëpunimit dypalësh, përfshirë angazhimin e Kosovës në Organizatën Ndërkombëtare të Frankofonisë, si dhe bashkëpunimi në arsim, kulturë dhe sport. Një ndër temat e diskutuara ishte edhe mbështetja e Francës për organizimin e Lojërave Mesdhetare “Prishtina 2030”.
Zëvendësministrja Gashi ka vlerësuar lartë mbështetjen e Francës për Kosovën, duke e cilësuar atë si një mike dhe partnere të qëndrueshme të vendit tonë.
“Franca është një mike dhe partnere e qëndrueshme e Kosovës. Vlerësojmë lartë përkrahjen e saj të vazhdueshme në proceset tona ndërkombëtare dhe zhvillimore”, ka deklaruar Gashi.
Ajo gjithashtu ka shprehur mirënjohje për angazhimin e Francës në promovimin e diplomacisë feministe dhe përfshirjen e grave në proceset vendimmarrëse ndërkombëtare, duke theksuar përkushtimin e Kosovës për të kontribuar në hapësirën frankofone dhe kulturore.
“Kosova mbetet e përkushtuar të kontribuojë në hapësirën frankofone dhe kulturore, duke promovuar barazinë gjinore dhe vlerat demokratike që ndajmë me Francën”, theksoi zëvendësministrja Gashi.
Palët u pajtuan të intensifikojnë bashkëpunimin në fushën e Frankofonisë, zhvillimit dhe diplomacisë kulturore, në frymën e miqësisë dhe vlerave të përbashkëta evropiane.
Gjatë takimit, zëvendësministrja Gashi u shoqërua nga ambasadori i Republikës së Kosovës në Francë, Mehdi Halimi.
