Xhavit Gashi, ish-atashe i Kosovës në ShBA, thotë se raketat “Javelin” që Kosova do t’i blejë nga ShBA kanë rendësi të madhe për ngritjen e kapaciteteve mbrojtëse sipas planit të Forcës së Sigurisë së Kosovës (FSK).
Gashi tha se ky lloj i raketave që janë kundër mjeteve të blinduara, janë përdorur edhe në luftën mes Ukrainës dhe Rusisë, që sipas tij kanë treguar kapacitet dhe efikasitet mbrojtës.
“FSK-ja tashmë është në fazën e dytë të plotësimit të planit 10-vjeçar, i cili përfundon në 2028-tën, ku blerjet janë të rëndësishme për ngritjen e kapaciteteve sipas planit të FSK-së dhe Ministrisë së Mbrojtjes. Blerjet e këtyre raketave ka një rëndësi të madhe për sigurinë rajonale, jo vetëm të Kosovës. Ky sistem i raketave kundër tenkave është i avancuar, kanë kapacitet dhe efikasitet, ku janë parë më së shumti në konfliktin – luftën e fundit në Ukrainë. Kjo, pra e vendos FSK-në dhe Kosovën në një pozicion më të avancuar në nivelin e sigurisë rajonale, por edhe si një partner edhe më i besueshëm për ShBA-të dhe NATO-n”, tha ai në emisionin “Ditari” në Tëvë1.
Ish-atasheu tha se me këto blerje me sisteme të tilla të armatimit, shtetet armike kanë druajtje, nëse planifikojnë të përfshihen në konflikt me Kosovën.
“Kjo blerje strategjike nuk i shërben vetëm mbrojtjes së Kosovës, sepse ne këtu nuk llogarisim vetëm raportet me Serbinë, mirëpo në kontekstin më të gjerë gjeo-strategjik këto blerje gjithsesi që ndikojnë në një lloj ‘deterrence’ që quhet në fjalorin ushtarak apo të ngjalljes së frikës së dyshimit të shteteve armike që mendojnë ta sulmojnë për shembull jo vetëm Kosovën, por regjionin që shkaktojnë telashe. Sepse, me sisteme të tilla të armatimit, normalisht që kanë një druajtje, nëse mendojnë ose planifikojnë të përfshihen në konflikte me Kosovën”, deklaroi ai.
Kosova ka bërë kërkesë për blerjen e 246 raketa kundërtanke “Javelin” në vlerë prej 75 milionë dollarësh që prodhohen nga ShBA-ja. Këtë e ka konfirmuar edhe Departamenti amerikan i Shtetit duke e cekur se kjo vjen si mbështetje e ShBA-së për përmirësimin e sigurisë dhe avancimin e aftësive mbrojtëse të Kosovës./teve1.info/
