Disa lokale janë përfshirë nga zjarri mëngjesin e sotëm te Tregu i Gjelbër, në Prishtinë.
Komandanti i zjarrfikësve të Kosovës, Malë Gashi për teve1.info ka thënë se 6 lokale janë përfshirë nga zjarri dhe ekipet tashmë janë duke e eliminuar zjarrin.
“Ekipi ka intervenuar shpejtë dhe është bërë prerja e zjarrit në dy anët e lokaleve që të mos përhapët më tepër. Gjashtë lokale kanë qenë të përfshira nga zjarri dhe tani jemi në eliminim të zjarrit. U shua. Nuk kemi informacione për persona të lënduar”, ka deklaruar ai për redaksinë.
Ndërsa, pronari i një lokali të djegur ka thënë se dëmi është i madh dhe nuk e di arsyen e zjarrit.
“Shkakun e djegies nuk e dimë. Dëmi është shumë i madhe, të makinave të kafes. Afërsisht dëmin e kam diku 15 mijë minimal sa i përket meje. Jam marrë më këtë lami që 50 vjet, skam pas problem me pajisje. Kurrë nuk e kam lënë pa e kontrollu lokalin pa e mshel”, ka deklaruar ai.
Zjarrin e kanë konfirmuar edhe nga Policia e Kosovës.
“Sot rreth orës 05:40, kemi pranuar informatën për një zjarr që ka përfshirë disa lokale në rrugën ‘Ilaz Agushi’ në Prishtinë. Në vendngjarje kanë dalë zjarrfikësit dhe policia të cilët janë duke u marrë me rastin. Nuk raportohet për persona të lënduar”.
